محسن نقوی کی یو اے ای کے نائب وزیراعظم و وزیر داخلہ سے ملاقات

سیکیورٹی چیلنجز سے نمٹنے کیلئے جدید ٹیکنالوجی خصوصاً آرٹیفشل انٹیلیجنس سے استفادہ کرنے کی ضرورت پر زور

جمعہ 11 جولائی 2025 13:47

محسن نقوی کی یو اے ای کے نائب وزیراعظم و وزیر داخلہ سے ملاقات

اسلام آباد(اُردو پوائنٹ اخبارتازہ ترین - این این آئی۔ 11 جولائی2025ء)وفاقی وزیر داخلہ محسن نقوی نے کہا ہے کہ یو اے ای کے ساتھ برادرانہ تعلقات ہر پاکستانی کیلئے اثاثہ ہے، سیکیورٹی سمیت دوطرفہ تعاون کے ہر شعبے میں تعاون کو مزید وسعت دینا چاہتے ہیں۔تفصیلات کے مطابق وزیر داخلہ محسن نقوی کی دورہ متحدہ عرب امارات کے دوران یو اے ای کے نائب وزیر اعظم و وزیر داخلہ سے ملاقات ہوئی۔

اماراتی وزارت داخلہ آمد پر محسن نقوی کا پٴْرتپاک استقبال کیا گیا اور انہیں گارڈ آف آنر پیش کیا گیا۔ محسن نقوی کا یو اے ای کی وزارت داخلہ کے اعلیٰ حکام سے تعارف بھی کروایا گیا۔ملاقات میں پاکستانی شہریوں کو درپیش یو اے ای ویزا کے ایشوز، سیکیورٹی تعاون، انسدادِ منشیات وسمگلنگ، غیر قانونی امیگریشن کی روک تھام کے لی اشتراک کار بڑھانے اور ٹیکنالوجی کے تبادلے پر گفتگو کی گئی۔

(جاری ہے)

ملاقات میں سیکیورٹی چیلنجز سے نمٹنے کیلئے جدید ٹیکنالوجی خصوصاً آرٹیفشل انٹیلیجنس سے استفادہ کرنے کی ضرورت پر زور دیا گیا۔ملاقات میں دونوں دوست ممالک کے درمیان تاریخی تعلقات، علاقائی صورتحال اور خطے میں پائیدار امن کے حوالے سے بھی بات چیت کی گئی۔دونوں وزرائے داخلہ کی جانب سے مختلف شعبوں میں دوطرفہ تعاون کو فروغ دینے کے عزم کا اعادہ کیا گیا۔پاکستانی شہریوں کیلئے ویزا خصوصاً ورک ویزا میں آسانیاں پیدا کرنے کے حوالے سے ضروری اقدامات پر بھی اتفاق رائے کیا گیا۔یو اے ای کے وزیر داخلہ کی اس ضمن میں ہر ممکن تعاون کی یقین دہانی کروائی گئی۔