ایمریٹس نے عالمی فضائی انڈسٹری میں سب سے زیادہ تجویز کردہ عالمی برانڈ کا اعزاز جیت لیا

کراچی(اُردو پوائنٹ اخبارتازہ ترین - آن لائن۔ 11 جولائی2025ء) دنیا کی سب سے بڑی بین الاقوامی ایئرلائن ایمریٹس کو یو گوو (YouGov) کی جانب سے 2025 کا سب سے زیادہ تجویز کردہ عالمی برانڈ قرار دیا گیا ہے۔ اس رپورٹ میں ایمریٹس نے 88.4 فیصد اسکور کے ساتھ پہلی پوزیشن حاصل کی اور وہ واحد ایئرلائن ہے جو ٹاپ 10 عالمی برانڈز کی فہرست میں شامل ہوئی ہے۔یو گوو (YouGov) کی جانب سے جاری کردہ اس رپورٹ میں صارفین سے یہ پوچھا گیا کہ وہ کس حد تک کسی برانڈ کو اپنے دوست یا ساتھی کو تجویز کریں گے۔

یو گوو برانڈ انڈیکس (YouGov BrandIndex)میں ایمریٹس نے دوسرے نمبر پر موجود برانڈ کے مقابلے میں نمایاں برتری حاصل کی۔ یہ درجہ بندی 28 عالمی مارکیٹس میں کیے گئے 10 لاکھ سے زائد صارفین کے سروے کی بنیاد پر تیار کی گئی ہے، جن کا یومیہ جائزہ جون 2024 سے مئی 2025 تک لیا گیا۔

(جاری ہے)

اس ضمن میں ہر ٹاپ 10 عالمی برانڈ کے لئے مثبت تجویزی اسکور کو جمع کیا جاتا ہے اور مارکیٹ میں اس برانڈ کے موجودہ کسٹمر بیس کے سائز سے جائزہ لیا جاتا ہے۔

ایمریٹس ایئرلائن کے صدر سر ٹِم کلارک نے اس کامیابی پر اظہار کرتے ہوئے کہا، ''یہ اعزاز ہمارے صارفین کے ساتھ مضبوط تعلق اور اعتماد کا اعتراف ہے۔ ہم انہیں محض منزل مقصود تک پہنچانے کا ذریعہ ہی نہیں بلکہ ایک قابلِ اعتماد اور معیاری سفری تجربہ فراہم کرتے ہیں۔ ہم پہلے سے اپنی شاندار سفری خدمات کو مزید بہتر بناتے رہیں گے اور سفر کے نئے معیار قائم کریں گے تاکہ ایمریٹس ہمیشہ ایسے برانڈ کے طور پر قائم رہے جسے ہمارے مسافر فخر سے دوسروں کو تجویز کریں۔

''ایمریٹس ہمیشہ سے اپنے صارفین کو اولین ترجیح دیتا آیا ہے۔ خواہ پرواز کے دوران ہو یا زمین پر، ہر مرحلے پر مسافروں کو یادگار تجربہ فراہم کیا جاتا ہے۔ ایئرلائن مسلسل اعلیٰ معیار کی سہولیات اور جدید ترین سروسز میں سرمایہ کاری کر رہی ہے تاکہ عالمی معیار کی خدمات مزید بہتر انداز سے پیش کی جاسکیں۔ سال 2025 کے پہلے چھ ماہ کے دوران ایمریٹس نے تین نئے مقامات کے لیے پروازیں شروع کیں، جبکہ ہانگژو (Hangzhou) کو جلد شامل کیا جائے گا۔

اس کے علاوہ ایشیا، افریقہ اور یورپ میں 9 عدد جدید سفری ریٹیل اسٹورز کھولے گئے۔ ایئرلائن نے اپنے نئے A350 طیاروں کو 10 مقامات پر سفر کے لئے تعینات کیا، اور اسے دنیا کی پہلی Autism Certified Airlineغ کا درجہ بھی حاصل ہوا ظ جو اس کے سب کے لیے قابل رسائی سفر کے وژن کی ایک بڑی کامیابی ہے۔دسمبر 2025 تک، ایمریٹس اپنے بیڑے میں جدید انٹیرئیرز کے حامل بوئنگ 777، A380، اور A350 طیاروں کے ذریعے 70 سے زائد شہروں میں خدمات فراہم کرے گی جو اسکے نیٹ ورک کا تقریباً 50 فیصد ہے۔

ایئرلائن دو ملین سے زیادہ پریمیئم اکانومی نشستیں فراہم کرے گی تاکہ زیادہ سے زیادہ مسافر ایمریٹس کی جدید ترین خدمات سے لطف اندوز ہو سکیں۔یہ پہلا موقع نہیں کہ ایمریٹس کو یو گوو نے سراہا ہو۔ 2024 کی رپورٹ میں ایمریٹس کو متحدہ عرب امارات کا سب سے زیادہ تجویز کردہ برانڈ قرار دیا گیا تھا، جہاں اسے 92.6 کا اسکور ملا۔ اسی سال، امریکہ میں منعقدہ یو گوو کے سروے میں ایمریٹس کو ''سب سے زیادہ مطمئن صارفین والی ایئرلائن'' قرار دیا گیا اور امریکی نوجوان نسل یعنی ملینیئلز اور جین زی میں بھی ایمریٹس کو ٹاپ 10 ایئرلائنز میں شمار کیا گیا۔

یو گوو ایک عالمی آن لائن ریسرچ ڈیٹا اور اینالٹکس کا ادارہ ہے جو غیر جانب دار مارکیٹ ریسرچ اور صارفین کے رویوں پر مبنی سروے کے لیے جانا جاتا ہے، اور اپنے معروف ٹریکنگ ٹول YouGov BrandIndex کے ذریعے ڈیٹا اکٹھا کرتا ہے۔