سراجیوو ، سعودی مذہبی اتاشی نے جامع مسجد کنگ فہد میں نئے قالین بچھانے کا کام مکمل کرلیا

ہفتہ 12 جولائی 2025 11:56

سراجیوو (اُردو پوائنٹ اخبارتازہ ترین - اے پی پی۔ 12 جولائی2025ء) بوسنیا ہرزگووینا میں سعودی سفارتخانے کے مذہبی اتاشی نے سراجیوو میں قائم کنگ فہد جامع مسجد میں 2100 مربع میٹر کے رقبے پر نئے قالین بچھانے کا کام مکمل کرلیا۔سعودی خبررساں ادارے (ایس پی اے ) کے مطابق مذہبی اتاشی نے سعودی وزارت اسلامی امور کی نمائندگی کرتے ہوئے جامع مسجد کنگ فہد میں نئے قالین بچھانے کا کام مکمل کیا۔

(جاری ہے)

اعلیٰ معیار کے نئے قالین نیچرل اون سے بنے ہیں جو علاقے کی موسمی صورتحال کے مطابق گرمی اور شدید سردی کو برداشت کرنے کی صلاحیت رکھتے ہیں، یہ اقدام مساجد کی مسلسل دیکھ بھال کے فریم ورک کے تحت دنیا بھر کے مسلمانوں اور اسلا م کی خدمت کےلیے کی جانے والی کوششوں کا حصہ ہے۔کنگ فہد جامع مسجد میں پرانے قالین کو دوبارہ قابل استعمال کیا گیا اور اسے 7 د یگر مساجد میں بچھایا گیا ہے۔ اس طرح مساجد کو آرام دہ اور مناسب ماحول میں عبادت کےلیے تیار کرنے میں مدد ملی۔واضح رہے کنگ فہد جامع مسجد بلقان خطے کی بڑی مساجد میں سے ایک ہے جہاں تقریبا 1500 نمازیوں کی گنجائش ہے۔اس مسجد کو 25 برس قبل مملکت کی طرف سے ایک تحفے کے طور پر بوسنیا کے عوام کے لیے تعمیر کرایا گیا تھا۔