سعودی قومی ائیرلائن السعودیہ کا بعد ازحج آپریشن مکمل

طیاروں سے 4400 پروازوں کو آپریٹ کیا گیا،ڈائریکٹر محمد عبدالرزاق

ہفتہ 12 جولائی 2025 18:56

ریاض(اُردو پوائنٹ اخبارتازہ ترین - این این آئی۔ 12 جولائی2025ء)سعودی عرب کی قومی فضائی کمپنی السعودیہ نے بعد ازحج آپریشن مکمل کرلیا۔سعودی خبررساں ادارے کے مطابق آخری فلائٹ گزشتہ روز مدینہ منورہ کے امیر محمد بن عبدالعزیز ایئرپورٹ سے انڈونیشی حجاج کو لے کرروانہ ہوئی۔

(جاری ہے)

ایئرلائن کے ڈائریکٹر گرائونڈ آپریشنز محمد عبدالرزاق کا کہنا تھا کہ اس سال حج سیزن کے دونوں مراحل 74 دن پر مشتمل تھے،السعودیہ کے ذریعے 8 لاکھ 8 ہزار سے زیادہ حجاج کو دوطرفہ سفری سہولت فراہم کی گئی۔

انہوں نے کہا کہ ایئرلائن کے ذریعے 145 ممالک سے حجاج کو سفری سہولت فراہم کی گئی جس میں 147 طیاروں کے ذریعے 4400 پروازوں کو آپریٹ کیا گیا۔انہوں نے بتایا کہ السعودیہ کا حج بغیرسامان کا اقدام کافی کامیاب رہا جس سے حجاج کو سہولت ہوئی اور ایئرپورٹس پر آمد و رفت میں کسی قسم کی دشواری کا سامنا نہیں کرنا پڑا۔آپریشن کے دوران حجاج کرام کو 2 لاکھ 40 ہزار آب زم زم کی بوتلیں بھی فراہم کی گئیں۔