Live Updates

علی امین گنڈاپور نے عمران خان کی رہائی کیلئے 90 دن کا الٹی میٹم دے دیا

اب یا ہم نہیں یا تم نہیں، منزل حاصل کریں گے یا سیاست چھوڑ دیں گے؛ وزیراعلیٰ خیبرپختونخواہ کا تقریب سے خطاب

ساجد علی اتوار 13 جولائی 2025 11:20

علی امین گنڈاپور نے عمران خان کی رہائی کیلئے 90 دن کا الٹی میٹم دے دیا

لاہور ( اُردو پوائنٹ اخبارتازہ ترین۔ 13 جولائی 2025ء ) وزیراعلیٰ خیبرپختونخواہ علی امین گنڈا پور نے حکومت کو بانی پی ٹی آئی عمران خان کی رہائی کیلئے 90 دن کا الٹی میٹم دیتے ہوئے کہا کہ اب یا ہم نہیں یا تم نہیں، منزل حاصل کریں گے یا سیاست چھوڑ دیں گے، مولانا خود جعلی مینڈیٹ پر ہیں، عوام نے مولانا فضل الرحمان کو مسترد کیا، مولانا اپنے اندر تبدیلی لے آئیں تو بہت اچھا ہوگا، انہوں نے لوگوں کو گمراہ کیا ہے۔

لاہور میں تقریب سے خطاب کرتے ہوئے انہوں نے کہا کہ ہمارے ارکان فعال نہ کیے تو ہم ان کے وہاں سارے فارغ کر دیں گے، ان کے جو اپوزیشن میں چیئرمین بنے ہوئے ہیں وہاں سب کو فارغ کردوں گا، پنجاب اسمبلی کے ارکان کو معطل کرنا لاقانونیت ہے، ہمارے مینڈیٹ پر پہلی بار ڈاکہ نہیں مارا گیا، 2013ء میں مینڈیٹ چوری کیا پھر 2018ء میں اکثریت کم کرنے کے لیے سسٹم بٹھایا گیا، عمران خان کا عزم ہے سیاست نہیں ملک کو ٹھیک کرنا ہے۔

(جاری ہے)

علی امین گنڈاپور نے کہا کہ بانی پی ٹی آئی کہتے ہیں آؤ میں مذاکرات کیلئے تیار ہوں، عمران خان کہتے ہیں ثابت کر دو میں نے کوئی سازش کی ہے جو سزا دو گے مجھے قبول ہوگی، ہم نے تو جبر برداشت کیا ہے مگر آپ سے برداشت نہیں ہوگا، ناجائز کرو گے تو ناجائز ہم بھی کریں گے، ہمارا لیڈر بے گناہ جیل میں ہے، اس پر کوئی کیس نہیں ہے، لاہور میں جلسہ کرنا آئینی حق ہے، حکومت نے اجازت دی تو شکریہ کہوں گا، جلسہ کرنے دیا گیا تو تحفہ بھی دوں گا، خیبرپختونخواہ کا پنجاب سے موازنہ کریں گے تو یہ زیادتی ہوگی۔