ایوب میڈیکل انسٹی ٹیوشن ایبٹ آباد کے ممبر بی او جی پروفیسرعالم زیب منان کا ہسپتال و کالج کا تفصیلی دورہ،سہولیات کا جائزہ لیا

ایبٹ آباد (اُردو پوائنٹ اخبارتازہ ترین - اے پی پی۔ 14 جولائی2025ء) ایوب میڈیکل انسٹی ٹیوشن کے ممبر بورڈ آف گورنرز پروفیسر عالم زیب منان نے ہسپتال اور کالج کے مختلف شعبوں کا تفصیلی دورہ کیا، اس موقع پر ڈین و سی ای او پروفیسر ڈاکٹر ثاقب ملک، ہسپتال ڈائریکٹر ڈاکٹر سجاد احمد آفریدی، میڈیکل ڈائریکٹر ڈاکٹر عمران خان اور دیگر سربراہان بھی ہمراہ تھے۔

پروفیسر عالم زیب منان نے ہاسٹلز، آئی بی پی پی رومز، آنکالوجی ڈیپارٹمنٹ، ای آر سی پی اور دیگر اہم مقامات کا معائنہ کیا۔ انہوں نے ہدایت کی کہ ایچ او فی میل ہاسٹل کی تزئین و آرائش کا کام فوری طور پر شروع کیا جائے، ایچ او فی میل ہاسٹل میں موجود خالی جگہ کو استعمال میں لایا جائے، پیرا میڈکس ہاسٹل میں اگر کوئی کمرے کسی دوسرے محکمہ کے ملازمین کے زیر استعمال ہیں تو انہیں فوری خالی کروا کر ایم ٹی آئی ایبٹ آباد کے ملازمین کو فراہم کیا جائے۔

(جاری ہے)

انہوں نے کہا کہ آئی بی پی پی رومز کو 50 فیصد آئی بی پی پی مریضوں کےلئے مختص کیا جائے جبکہ باقی 50 فیصد کو پرائیویٹ کمروں کے طور پر فعال کیا جائے، آنکالوجی ڈیپارٹمنٹ کے میڈیسن سٹور پر بورڈ آف گورنرز کو مکمل بریفنگ دی جائے۔ ان کا کہنا تھا کہ ای آر سی پی میں جو مشینیں درست کام نہیں کر رہیں انہیں فوری طور پر الیکٹرو میڈیکل ڈیپارٹمنٹ سے مرمت کروایا جائے جس پر فوری عمل درآمد کرتے ہوئے مشینیں ٹھیک کر دی گئیں۔

انہوں نے کہا کہ ہاسٹلز میں تمام پلمبنگ کے نظام کا مکمل جائزہ لیا جائے اور مرمت کی جائے، فاطمہ جناح ہاسٹل کی بوسیدہ دیوار کو فوری گرا کر نئی دیوار کی تعمیر کا عمل شروع کیا جائے۔ دورے کے بعد پروفیسر عالم زیب منان نے پروکیورمنٹ ڈیپارٹمنٹ اور مینٹیننس ڈیپارٹمنٹ کے ساتھ خصوصی اجلاس کیا۔ اس دوران پیرا میڈکس ہاسٹل میں کام کی سست روی پر سخت برہمی کا اظہار کیا گیا۔ پروکیورمنٹ ڈیپارٹمنٹ سے نئے جاری ہونے والے ٹینڈرز سے متعلق بھی تفصیلی بات چیت کی گئی۔ پروفیسر عالم زیب منان نے ادارے کی بہتری کےلئے تمام محکموں کو اپنی کارکردگی مزید بہتر بنانے کی ہدایت دی اور ادارے کی ترقی کےلئے مکمل تعاون کی یقین دہانی کروائی۔