ملتان میں افسوسناک ٹریفک حادثہ ، وزیر ٹرانسپورٹ کا نوٹس ، انکوائری کا حکم

پیر 14 جولائی 2025 23:05

لاہور (اُردو پوائنٹ اخبارتازہ ترین - این این آئی۔ 14 جولائی2025ء) ملتان میں افسوسناک ٹریفک حادثے پر وزیر ٹرانسپورٹ اینڈ ماس ٹرانزٹ بلال اکبر خان نے فوری ایکشن لیتے ہوئے واقعہ کی فوری رپورٹ طلب کر کے انکوائری کا حکم دے دیا ہے۔ مزید برآں انہوں نے غفلت برتنے والوں کے خلاف سخت کارروائی عمل میں لانے کی بھی ہدایت کی ہے۔ فیڈر بس حادثہ کے زخمیوں کو بہترین علاج فراہم کرنے کا حکم دیتے ہوئے ان کی ہر طرح سے دیکھ بھال کرنے کیلئے تمام اقدامات اٹھانے کی ہدایت بھی کی گئی ہے۔

وزیر ٹرانسپورٹ بلال اکبر خان کا کہنا ہے کہ ملتان میں پیش آنیوالے واقعہ پر بہت دکھ ہے اور اس حادثہ کی انکوائری کیلئے خصوصی ٹیم تشکیل دے دی ہے۔ ڈرائیور کی غفلت پائے جانے پر قانون کے مطابق کارروائی کی جائیگی جبکہ حادثے کے فوری بعد ہی ڈرائیور کو گرفتار کر کے باقاعدہ انکوائری بھی شروع کی جا چکی ہے۔

(جاری ہے)

ان کا مزید کہنا تھا کہ ایسے واقعات کی روک تھام کیلئے فیڈر بسوں سمیت تمام میٹروز بسوں کے ڈرائیورز کی بھی دوبارہ جانچ کرائیں گے کیونکہ ہمارا مقصد عوام کو بہترین سفری سہولیات فراہم کرنا ہے اس لیے ایسے حادثات کی کوئی گنجائش نہیں۔

صوبائی وزیر نے بارشوں کے دوران بھی ٹریفک حادثات سے بچنے کے لیے اقدامات کرنے کی ہدایت کی ہے جبکہ میٹروز ٹریکز کو ہر صورت بحال رکھنے اور ٹریک پر لگائے گئے جنگلوں کو توڑ پھوڑ سے بچانے کیلئے فوری سیکورٹی بڑھانے اور کیمروں کی تنصیب کا حکم بھی دیا ہے۔