وزیراعلی مریم نواز کا اپنی چھت،اپنا گھر منصوبے کی رفتار مزید تیز کرنے کا حکم

پیر 14 جولائی 2025 23:18

لاہور (اُردو پوائنٹ اخبارتازہ ترین - اے پی پی۔ 14 جولائی2025ء) وزیراعلی پنجاب مریم نواز شریف کی زیر صدارت اپنی چھت اپنا گھر پروگرام سے متعلق اہم اجلاس منعقد ہوا،جس میں صوبے میں جاری اپنی چھت، اپنا گھر پروگرام کا جائزہ لیا گیا۔ اپنی چھت، اپنا گھر پروگرام سے اب تک51 ہزار سے زائد خاندانوں کا خواب حقیقت بنا ہے۔وزیراعلی مریم نواز نے اپنی چھت،اپنا گھر منصوبے کی رفتار مزید تیز کرنے کا حکم دیا ہے۔

اجلاس کو منصوبے کی موجودہ صورتحال پر تفصیلی بریفنگ دی گئی۔بریفنگ میں بتایا گیا کہا کہ اپنی چھت،اپنا گھر پروگرام کے پلیٹ فارم سے 51 ہزار نو سو گیارہ نادار خاندانوں کو قرضہ فراہم کیا جا چکا ہے۔اپنی چھت،اپنا گھر پروگرام کے تحت اب تک60 ارب 50 کروڑ روپے کی خطیر رقم تقسیم کی جا چکی ہے۔

(جاری ہے)

45,178 گھر زیر تعمیر ہیں جبکہ 6،160 گھر مکمل ہو چکے ہیں۔

وزیراعلی مریم نواز نے کہا کہ ہر فیصلے کاKPI عوام کی ترقی،تحفظ اور سہولت ہے یہی قائد محمد نواز شریف کا ویژن ہے اور میرا عہد ہے۔جس دن ایک غریب کے سر پر چھت آ جاتی ہے اس دن ریاست کامیاب ہو جاتی ہے۔روایتی سیاست کا دروازہ بند کیا اور خدمت کا در کھول دیا ہے۔وزیراعلی مریم نواز نے کہا کہ اپنی چھت،اپنا گھر محض اینٹوں اور دیواروں کا منصوبہ نہیں نادار افراد کیلئے نئی زندگی کا آغاز ہے۔پاکستان میں پہلی بار ہوا ہے کہ اتنے بڑے پیمانے پر غریب اور بے گھر خاندانوں کیلئے عملی اقدامات ہو رہے ہیں۔میری دن رات کوشش ہے کہ پنجاب کا کوئی شہری بغیر چھت کے نہ رہے۔