کے پی، سینیٹ کی خالی نشستوں پر پولنگ 21 جولائی کو ہوگی ، الیکشن کمیشن

پیر 14 جولائی 2025 23:27

اسلام آباد (اُردو پوائنٹ اخبارتازہ ترین - این این آئی۔ 14 جولائی2025ء)الیکشن کمیشن آف پاکستان (ای سی پی) نے خیبر پختونخوا سے سینیٹ کی خالی نشستوں پر 21 جولائی کو پولنگ کروانے کا اعلان کر دیا،الیکشن کمیشن کے مطابق سینیٹ کی 11 خالی نشستوں کے لیے 16 امیدوار میدان میں ہیں۔جنرل نشست کیلئے جے یو آئی (ف) کے عطاء الحق، پیپلز پارٹی کے طلحہ محمود اور مسلم لیگ (ن) سے نیاز احمد جنرل نشست کے لیے امیدوار ہیں۔

(جاری ہے)

الیکشن کمیشن کے مطابق جنرل نشست کے لیے آزاد امیداروں میں مراد سعید، اعظم سواتی، نور الحق قادری، فیصل جاوید، مرزا محمد آفریدی اور محمد وقاص آزاد، دلاور خان، فیض الرحمان اور عرفان سلیم شامل ہیں۔شفقت ایاز، خرم ذیشان، اظہر قاضی اور آصف رفیق بھی آزاد امیدواروں میں شامل ہیں۔الیکشن کمیشن کے مطابق خواتین کی 2 نشستوں کے لیے 4 خواتین امیدوار مدمقابل ہیں جن میں پیپلز پارٹی سے روبینہ خالد اور روبینہ ناز امیدوار ہیں جبکہ عائشہ بانو اور مہوش علی آزاد امیدوار ہیں۔

الیکشن کمیشن کے مطابق ٹیکنوکریٹ اور عالم کی 2 نشستوں کے لیے 6 امیدوار ہیں۔جے یو آئی (ف) سے دلاور خان امیدوار ہیں جبکہ خالد مسعود، ارشاد حسین، اعظم سواتی، نور الحق قادری اور وقاص احمد قاضی آزاد امیدوار ہیں۔