گوگل کمپنی کے پاکستان آنے سے متعلق بات چیت ہو رہی ہے، وزیر آئی ٹی

اسلام آباد ( اُردو پوائنٹ اخبارتازہ ترین۔ 14 جولائی 2025ء ) وفاقی وزیر برائے آئی ٹی شزہ فاطمہ خواجہ کا کہنا ہے کہ گوگل کمپنی کے پاکستان آنے سے متعلق بات چیت ہورہی ہے۔ تفصیلات کے مطابق چیئرمین امین الحق کی زیر صدارت قومی اسمبلی کی قائمہ کمیٹی برائے آئی ٹی کا اجلاس ہوا، اجلاس کے دوران مائیکرو سافٹ آپریشنز کی پاکستان میں بندش کے معاملے پر بحث کی گئی۔

اس موقع پر وفاقی وزیر آئی ٹی شزہ فاطمہ خواجہ نے کہا کہ مائیکرو سافٹ نے پچھلے ایک سال میں 16 ہزار لوگوں کو نوکری سے نکالا ہے، مائیکروسافٹ نے پاکستان سے متعلق اعلان سے قبل پوری دنیا سے ہزاروں ملازمین نکالے، مائیکرو سافٹ کے پاکستان میں پانچ لوگ ہیں، یہ واضح نہیں ہے کہ یہ پانچ لوگ جا رہے ہیں کہ نہیں، مائیکرو سافٹ کا پاکستان میں آپریشنل آفس نہیں ہے، ہماری کوشش ہے مائیکرو سافٹ کا آپریشنل آفس پاکستان میں قائم ہو، گوگل کے پاکستان آنے سے متعلق بھی بات ہورہی ہے۔

(جاری ہے)

دوسری طرف بتایا جارہا ہے کہ مائیکروسافٹ نے مبینہ طور پر پاکستان میں اپنا آپریشن بند کر دیا ہے، جس سے ملک میں عالمی ٹیک کمپنی کے 25 سالہ باب کا خاتمہ ہو گیا، اس حوالے سے چند ملازمین کو ابھی حال ہی میں باضابطہ طور پر مطلع کیا گیا تھا کہ کمپنی پاکستان میں اپنے بزنس کو مکمل طور پر ختم کر رہی ہے، مائیکروسافٹ کے بانی کنٹری منیجر جواد رحمان نے کمپنی کے پاکستان کے جانے سے متعلق "ایک دور کا خاتمہ" کے طور پر تبصرہ کیا،انہوں نے مزید کہا کہ یہ صرف ایک کام نہیں تھا بلکہ مائیکرو سافٹ کے پاکستان میں گزرے سال لوگوں کو ترقی دینے، شراکت داری قائم کرنے، اعتماد حاصل کرنے اور پاکستانی نوجوان نسل کے لیے مواقع پیدا کرنے کے بارے میں تھے، پاکستان میں اپنے دور میں مائیکروسافٹ نے دور دراز کے علاقوں میں سینکڑوں کمپیوٹر لیبز بنائیں۔

خیال رہے کہ مائیکروسافٹ کا اخراج ایک ایسے وقت میں ہوا ہے جب پاکستان کو بڑھتی ہوئی معاشی غیر یقینی صورتحال اور بڑھتی ہوئی ڈیجیٹل تقسیم کا سامنا ہے، پاکستان جو ایک دور میں تکنیکی سرمایہ کاری کے لیے ایک ممکنہ مرکز سمجھا جاتا تھا لیکن حالیہ کچھ عرصے میں ملک نے متعدد عالمی فرموں کو یہاں اپنے کاروبار کو کم یا اس پر نظر ثانی کرتے ہوئے دیکھا ہے، مائیکروسافٹ نے ملک میں سیاسی افراتفری کے بعد ویتنام میں اپنے منصوبوں کو منتقل کرنے سے پہلے 2022ء میں پاکستان میں اپنے بزنس کو توسیع دینے پر غور کیا تھا، تاہم مائیکروسافٹ کی جانب سے اس خبر کی اشاعت تک پاکستان میں اپنے کاروبار کی بندش سے متعلق باضابطہ طور پر کوئی اعلان سامنے نہیں آیا۔