دلائی لامہ کی جانشینی پر تنازع، چین کی بھارت کو سخت تنبیہ

پیر 14 جولائی 2025 21:37

بیجنگ (اُردو پوائنٹ اخبارتازہ ترین - آن لائن۔ 14 جولائی2025ء) بھارت اور چین کے درمیان پہلے سے موجود سرحدی کشیدگی میں ایک بار پھر شدت آگئی ہے۔تبت کے روحانی پیشوا دلائی لامہ کی جانشینی سے متعلق بیانات پر بیجنگ نے نئی دہلی کو سخت تنبیہ کی ہے۔ بر طانوی خبر رساں ادارے کے مطابق چینی سفارتخانے نے واضح کیا ہے کہ دلائی لامہ کا دوبارہ جنم اور جانشینی کا معاملہ مکمل طور پر چین کا اندرونی معاملہ ہے۔

اس پر بھارت کا کوئی بھی مؤقف یا مداخلت تعلقات میں مزید بگاڑ پیدا کر سکتے ہیں۔چین کا یہ بیان جے شنکر کے 15 جولائی سے دورہ چین سے قبل سامنے آیا ہے۔جے شنکر شنگھائی تعاون تنظیم کے اجلاس میں شرکت کریںگے۔یہ دورہ 2020 کی مہلک سرحدی جھڑپوں کے بعد بھارت اور چین کے درمیان پہلا اعلیٰ سطحی رابطہ ہو گا۔

(جاری ہے)

ان جھڑپوں میں کم از کم 20 بھارتی اور 4 چینی فوجی ہلاک ہوئے تھے۔

میڈیا رپورٹ کے مطابق حال ہی میں دلائی لامہ کی 90ویں سالگرہ کی تقریبات بھارت میں منعقد ہوئیں۔ان تقریبات میں بھارتی وزرائ اور حکام کی شرکت نے چین کو شدید ناراض کیا۔دلائی لامہ نے ایک بار پھر کھل کر کہا ہے کہ ان کی جانشینی میں چین کا کوئی کردار نہیں ہو گا۔بیجنگ نے ان بیانات کو اپنی ریاستی خودمختاری کے خلاف قرار دیا ہے۔ نئی دہلی میں چینی سفارتخانے کے ترجمان کے مطابق تبت (ڑیزانگ) سے متعلق مسائل انتہائی حساس ہیں۔

دلائی لامہ کارڈ کھیلنا بھارت کے لیے بوجھ بن سکتا ہے۔ایسا کرنا بھارت کے لیے اپنے پاؤں پر گولی مارنے کے مترادف ہو گا۔دلائی لامہ 1959 میں چین کے خلاف بغاوت کے بعد سے بھارت میں جلاوطنی کی زندگی گزار رہے ہیں۔ان کی موجودگی بھارت کی تزویراتی پالیسی میں ایک اہم کردار رکھتی ہے۔چین ہمیشہ سے دلائی لامہ کو ایک حساس سفارتی مسئلہ تصور کرتا رہا ہے۔ بھارت میں تقریباً 70,000 تبتی پناہ گزین اور ایک جلاوطن تبتی حکومت بھی موجود ہے۔دلائی لامہ کی جانشینی ثابت کرتی ہے کہ بھارت اور چین میں صرف سرحدی تنازعات نہیں ہیں۔یہ صورتحال خطے کی سیاسی حرکیات کو مزید حساس اور غیر یقینی بنا رہی ہے۔