برطانیہ، حکومت کا 18 سے 21سالہ نوجوان کو روزگار، تعلیم یا تربیت میں شامل کرنے کا منصوبہ

پیر 14 جولائی 2025 23:05

لندن(اُردو پوائنٹ اخبارتازہ ترین - این این آئی۔ 14 جولائی2025ء)برطانیہ کی حکومت نے نوجوانوں کے لیے ایک نیا اقدام شروع کیا ہے جسے یوتھ گارنٹی کا نام دیا گیا ہے۔ اس منصوبے کا مقصد ہے کہ ہر 18 سے 21 سالہ نوجوان یا تو روزگار میں، کسی تربیتی پروگرام میں شامل ہو یا تعلیم حاصل کر رہا ہو۔ یہ اسکیم پلان فار چینج" کے تحت متعارف کروائی گئی ہے تاکہ نوجوانوں کے لیے مواقع بڑھائے جائیں اور ان کے راستے کی رکاوٹیں ختم کی جا سکیں۔

(جاری ہے)

اس منصوبے کے تحت انگلینڈ بھر میں آٹھ یوتھ گارنٹی ٹرائل بلیزرز کا آغاز کیا گیا ہے جو نوجوانوں کے لیے ملازمت اور مہارت کے شعبوں میں معاونت فراہم کریں گے، ساتھ ہی جاب سینٹرز کو بھی جدید بنایا جا رہا ہے۔ اس تمام عمل کے لیے حکومت نے 45 ملین پائونڈ کی سرمایہ کاری کی ہے ،اب نوجوانوں کی رائے سے پالیسیاں بنیں گی، حکومت نے نوجوانوں کی رہنمائی کے لیے ایک یوتھ ایڈوائزری پینل بھی قائم کیا ہے تاکہ نوجوانوں کی آرا سے یہ منصوبہ بہتر طریقے سے تشکیل دیا جا سکے۔ اس پینل میں شامل نوجوان پہلے ہی حکومت کو ایسی تجاویز دے چکے ہیں جن پر عملدرآمد شروع ہو چکا ہے۔