سعودی فالکن کلب کے تحت انٹرنیشنل فالکن بریڈرز آکشن کا آغاز 5 اگست سے ہو گا

منگل 15 جولائی 2025 12:04

ریاض (اُردو پوائنٹ اخبارتازہ ترین - اے پی پی۔ 15 جولائی2025ء) سعودی فالکن کلب کے تحت ریاض کے شمال میں واقع ملہم میں رواں سال انٹرنیشنل فالکن بریڈرز آکشن کا انعقاد کیا جائے گا۔اردو نیوز کے مطابق نیلامی کا آغاز5 اگست سے ہوگا جو 25 اگست تک جاری رہے گا۔یہ ایونٹ دنیا بھر سے تعلق رکھنے والے شکاری پرندوں کے شوقین اورماہرین کے لیے پرکشش ہو گا جو نہ صرف فالکن کی خرید و فروخت کے لیے بلکہ عالمی اورمقامی اعلی معیار کی افزائش نسل کے طریقوں کو جاننے کے لیےبھی اس میں شرکت کریں گے۔

بین الاقوامی سطح پر فالکن فیسٹول ایک معتبر پلیٹ فارم تصور کیا جاتا ہے جس سے نہ صرف اس شعبے میں سرمایہ کاری کو فروغ دینے میں معاونت کرتا ہے بلکہ اس حوالے سے عالمی سطح پر مملکت کی پوزیشن کو بھی مستحکم بنانے کے لیے اہم ہے۔

(جاری ہے)

گزشتہ سال نیلامی ایڈیشن میں 56 فارمز نے شرکت کی جن میں 13 سعودی اور 43 کا تعلق 19 ممالک سے تھا۔ نیلامی میں 866 باز فروخت کیے گئے جن کی مالیت ایک کروڑ 6 لاکھ ریال سے زائد تھی۔

گذشتہ سال مقامی فارمز کا سب سے مہنگا باز 2 لاکھ 10 ہزار ریال میں فروخت ہوا جبکہ امریکی فارمز پیسفک نارتھ ویسٹ کی جانب سے پیش کیا گیا سب سے مہنگا باز 4 لاکھ ریال میں فروخت کیا گیا۔خیال رہے کہ سعودی فالکن کلب کے زیر انتظام ہونے والی سالانہ نیلامی عالمی سطح پرسب سے بڑی نیلامی سمجھی جاتی ہے جس میں دنیا بھر سے فالکن کے شوقین بڑی تعداد میں شرکت کرتے ہیں۔