پاکستان ایشین انڈر 16 والی بال چیمپئن شپ کے سیمی فائنل میں پہنچ گیا

بدھ 16 جولائی 2025 17:02

بنکاک (اُردو پوائنٹ اخبارتازہ ترین - اے پی پی۔ 16 جولائی2025ء) پاکستان کی ٹیم اپنی شاندار کارکردگی کی بنیاد پر ایشین انڈر 16 والی بال چیمپئن شپ کے سیمی فائنل میں پہنچ گئی۔ پاکستان کی انڈر 16 ٹیم نے انڈونیشیا کو شکست دے کر ٹاپ فور رائونڈ کے لئے کوالیفائی کیا۔ پاکستان کے محمد جنید، فیضان اللہ، ساران بیگ اور طلحٰہ مہر نے نمایاں کھیل پیش کیا، جنید نے 10 اٹیک پوائنٹس سمیت 15 پوائنٹس بنائے اور فیضان نے 11 پوائنٹس حاصل کیے اور اپنی ٹیم کی فتح میں اہم کردار ادا کیا۔

تھائی لینڈ میں جاری ایونٹ میں ناقابل شکست پاکستان نے ابتدائی گروپ سٹیج کے مسلسل 3 میچز جیتنے کے بعد کراس اوور راؤنڈ میں جگہ بنائی جہاں پہلے میچ میں اس کا مقابلہ انڈونیشیا سے ہوا جس میں پاکستان کی جیت کاسکور 23-25، 20-25 اور 20-25 رہا ۔

(جاری ہے)

پاکستان نے پہلے سیٹ میں 3-12 کے خسارے سے نکل کر شاندار کم بیک کیا اور پھر حریف انڈونیشیاکی ٹیم کو گیم میں واپسی کا موقع نہیں دیا۔

مجموعی طور پر میچ میں پاکستان نے اٹیک اور بلاک پوائنٹس میں سبقت حاصل رکھی جبکہ سروس پوائنٹس میں انڈونیشیا آگے رہا۔پاکستان نے انڈونیشیا کے 34 کے مقابلے میں 37 اٹیک پوائنٹس اور 14 بلاک پوائنٹس حاصل کیے جبکہ انڈونیشیا صرف 3 بلاک پوائنٹس حاصل کرسکا ۔پاکستان ٹیم کی جانب سے محمد جنید، فیضان اللہ، ساران بیگ اور طلحٰہ مہر نے نمایاں کھیل پیش کیا، جنید نے 10 اٹیک پوائنٹس سمیت 15 پوائنٹس بنائے اور فیضان نے 11 پوائنٹس حاصل کیے۔

کراس اوور راؤنڈ گروپ ایف سے اب تک ناقابل شکست پاکستان اور ایران سیمی فائنل میں پہنچ گئے ہیں، کراس اوور راؤنڈ گروپ میں پاکستان کل ایران سے مقابلہ کرے گا اور سیمی فائنل میں پاکستان کے حریف کا فیصلہ پاکستان اور ایران کے میچ کے بعد ہوگا۔واضح رہے کہ پاکستانی ٹیم نے مسلسل 4 میچز بغیر کوئی سیٹ ڈراپ کیے جیتے ہیں جبکہ پاکستان نے سیمی فائنل تک رسائی کے ساتھ آئندہ سال ہونیوالی انڈر 17 ورلڈ چیمپئن شپ کیلئے بھی کوالیفائی کرلیا۔پاکستان سیمی فائنل میں جگہ بنانے والی پہلی ٹیم ہے۔قبل ازیں، چیمپیئن شپ میں پاکستان انڈر 16 والی بال ٹیم نے گروپ ڈی میں کوریا اور سعودی عرب کو شکست دینے کے بعد چائینیز تائپے کو بھی مات دی تھی۔\932