مون سون کا زوردار سپیل، مختلف علاقوں میںچھتیں گرنے ،کرنٹ لگنے سے بچوں ،خواتین سمیت17جاں بحق،11زخمی

لاہور/ رائے ونڈ/فیصل آباد/چشتیاں/پاکپتن /اوکاڑہ(اُردو پوائنٹ اخبارتازہ ترین - این این آئی۔ 16 جولائی2025ء)صوبائی دارالحکومت لاہور سمیت پنجاب کے مختلف شہروں میں مون سون بارشوں کا سلسلہ جاری ہے ، گھروں کی چھتیں گرنے اور کرنٹ لگنے سے بچوں اور خواتین سمیت 17افراد جاں بحق 11زخمی ہو گئے ۔لاہور اور گردونواح میں رات بھر وقفے وقفے سے موسلا دھار بارش کا سلسلہ جاری رہا جس سے نشیبی علاقے زیر آب آ گئے جبکہ شاہراہیں تالاب کا منظر پیش کرتی رہیں۔

بارش کے باعث لاہور کے علاقے ٹھوکر نیاز بیگ کے گائوں مرید وال میں گھر کی چھت گرنے سے ایک ہی خاندان کے 5افراد جاں بحق ہوگئے جبکہ 2افراد زخمی ہوئے، جاں بحق افراد میں 60سالہ مانگا، 55سالہ عشرت، 3سالہ خدیجہ، 4سالہ لطیفہ اور 35سالہ رانی جبکہ زخمیوں میں 30سالہ فیصل اور 5سالہ ببلی شامل ہیں۔

(جاری ہے)

بد قسمت خاندان نے ایک ماہ قبل جگہ خرید کر کچا گھر بنایا تھا۔

اس کے علاوہ رائیونڈ کے علاقے مشن کالونی میں مکان کی چھت گرنے سے 3افراد جان کی بازی ہار گئے، ایک شخص کو زندہ نکال لیا گیا۔کوٹ جمال رائیونڈ روڈ میں چھت گرنے سے ایک شخص جاں بحق اور 3افراد زخمی ہوئے، باغبانپورہ کے علاقے مومن پورہ روڈ پر ایک گھر کی چھت گر گئی جس سے 3افراد جان کی بازی ہار گئے،حویلی لکھا اور اوکاڑہ میں چھتیں گرنے سے 2افراد جان سے چلے گئے،رینالہ خورد میں کرنٹ لگنے سے 2افراد جان کی بازی ہار گئے۔

چشتیاں میں مکان کی چھت گر گئی جس سے ملبے تلے دب کر ماں اوربیٹا زخمی ہوگئے، پاکپتن میں بھی مکان کی چھت گرنے سے 3افراد زخمی ہوگئے جنہیں ہسپتال منتقل کر دیا گیا، فیصل آباد کے علاقے رچنا ٹائون میں بارش کے باعث گھر کی خستہ حال چھت گرنے سے ملبے تلے دب کر میاں بیوی جاں بحق ہوگئے، حادثے میں تینوں بچے محفوظ رہے۔واسا لاہور کے مطابق صوبائی دارالحکومت کے علاقے پانی والا تالاب میں سب سے زیادہ 171ملی میٹر، اقبال ٹائون میں 169ملی میٹر، تاجپورہ میں 167ملی میٹر، مغلپورہ میں 135، لکشمی چوک میں 133ملی میٹر بارش ریکارڈ کی گئی۔

دوسری جانب پنجاب کے مختلف شہروں ڈسکہ، حافظ آباد، وزیرآباد، سانگلہ ہل، گوجرانوالہ، فیصل آباد، ننکانہ صاحب، منچن آباد، بہاولنگر، پاکپتن، عارف والا، قصور اور فاروق آباد میں بھی موسلا دھار بارش ہوئی جس سے نشیبی علاقے زیرآب آگئے۔بارش سے بجلی کی تقسیم کار کمپنیوں کا نظام بھی متاثر ہوا اور فیڈرز ٹرپ ہونے سے گھنٹوں بجلی بند رہی ۔محکمہ موسمیات نے آئندہ 24گھنٹوں میں پنجاب کے بیشتر اضلاع میں مزید موسلادھار بارشوں کی پیشگوئی کی ہے، مون سون کا یہ سپیل 17جولائی تک جاری رہنے کا امکان ہے۔