آئی ایل ٹی 20 سیزن 3 کا سامان مڈغاسکر کے بچوں کے لیے مسکراہٹوں کا پیغام بن گیا

بدھ 16 جولائی 2025 22:32

دبئی (اُردو پوائنٹ اخبارتازہ ترین - آن لائن۔ 16 جولائی2025ء)ڈی پی ورلڈ انٹرنیشنل لیگ ٹی 20 نے متحدہ عرب امارات کے فلاحی ادارے گلف فار گُڈ کے ساتھ اشتراک کرتے ہوئے دنیا بھر کے بچوں کے لیے تعلیمی اور سماجی ترقی کے منصوبوں میں اپنا حصہ ڈالنا شروع کر دیا ہے۔ اس اشتراک کے تحت لیگ کے سیزن 3 کا پرانا مرچنڈائزنگ سامان مڈغاسکر کے بچوں میں تقسیم کیا گیا ہے۔

ابتدائی مرحلے میں 500 سے زائد اشیاء دی گئی ہیں، جبکہ طویل المدتی منصوبے کے تحت 2000 سے زائد بچوں کو اس پروگرام سے فائدہ پہنچنے کی توقع ہے۔

(جاری ہے)

ڈی پی ورلڈ آئی ایل ٹی 20 کے سی ای او ڈیوڈ وائٹ کا کہنا تھا کہ یہ شراکت داری کھیل کی طاقت اور اس کے ذریعے مثبت اثرات پھیلانے کے ہمارے عزم کی عکاسی کرتی ہے۔ ہم صرف کرکٹ تک محدود نہیں بلکہ معاشرے میں بہتری کے لیے بھی پرعزم ہیں۔ ہمیں فخر ہے کہ ہمارا گھر یو اے ای ہے، جو دنیا کا سب سے فیاض اور مہمان نواز ملک مانا جاتا ہے۔ ڈی پی ورلڈ آئی ایل ٹی 20 کا چوتھا سیزن 2 دسمبر 2025 (یومِ اتحاد - عید الاتحاد) کو ایک شاندار افتتاحی میچ کے ساتھ شروع ہوگا۔ اس چھ ٹیموں پر مشتمل ٹورنامنٹ میں 34 میچز کھیلے جائیں گے، جبکہ فائنل 4 جنوری 2026 کو منعقد ہوگا۔