انگلش پریمیئر فٹ بال لیگ کے 34ویں سیزن کا آغاز 15اگست سے ہوگا

جمعرات 17 جولائی 2025 23:06

لندن (اُردو پوائنٹ اخبارتازہ ترین - این این آئی۔ 17 جولائی2025ء)انگلش پریمیئر فٹ بال لیگ کے 34 ویں سیزن کا آغاز15اگست سے ہوگا۔یہ مجموعی طور پر ٹاپ فلائٹ انگلش فٹ بال کا 127واں ایڈیشن ہوگاجس کے شیڈول کا اعلان 18 جون 2025 کو کیا گیا تھا۔ لیورپول کی ٹیم ای پی ایل میں اپنے اعزاز کا دفاع کریگی جس نے گزشتہ سیزن میں اپنا دوسرا ای پی ایل ٹائٹل اپنے نام کیا تھا اور مجموعی طور پر بیسواں انگلش ٹاپ فلائٹ تاج اپنے سر سجایا تھا۔

انگلش پریمیئر لیگ میں 20 ٹیمیں ٹائٹل کے حصو ل کے لئے پنجہ آزمائی کریں گی۔گزشتہ سیزن کی ٹاپ 17ٹیمیں اور چیمپئن شپ کی درجہ بندی میں ترقی پانیوالی تین ٹیمیں لیڈز یونائیٹڈ، برنلے اور سنڈرلینڈ ہیں جو لیگ میں جگہ پکی کرنے میں کامیاب ہوئیں۔ ان تین ٹیموں نے لیسٹر سٹی، ایپسوِچ ٹاؤن، اور ساؤتھمپٹن کی جگہ لی ہے جبکہ لیسٹر سٹی، ایپسوِچ ٹاؤن، اور ساؤتھمپٹن کی ٹیمیں خراب کارکردگی کی بنیاد پر انگلش پریمیئر لیگ کے آئندہ سیزن میں جگہ حاصل نہیں کرپائی ہیں۔

(جاری ہے)

انگلش پریمیئر لیگ کے آئندہ سیزن میں شامل 20 کلبوں کی ٹیموں میں دفاعی چیمپئن لیورپول،آرسنل،آسٹن ولا،بورن مائوتھ،برینٹ فورڈ،برائٹن اینڈ ہوو البیون،برنلے،چیلسی،کرسٹل پیلس،ایورٹن،فلہم،لیڈز یونائیٹڈ،مانچسٹر سٹی،مانچسٹر یونائیٹڈ،نیوکیسل یونائیٹڈ،ناٹنگھم فارسٹ،سنڈرلینڈ،ٹوٹنہم ہاٹ پور،ویسٹ ہیم یونائیٹڈ اور وولور ہیمپٹن شامل ہیں۔واضح رہے کہ انگلش پریمیئر فٹ بال لیگ کے 34 ویں سیزن کا پہلا میچ15 اگست کو دفاعی چیمپئن لیورپول اور بورن مائوتھ کی ٹیموں کے درمیان این فیلڈ،لیورپول میں کھیلا جائیگا۔

Facebook Twitter Google + Share on Whatsapp

انگلش پریمیئر فٹ بال لیگ کے 34ویں سیزن کا آغاز 15اگست سے ہوگا

مزید کھیلوں کی خبریں