پاکستان کی فتوحات کا تسلسل برقرار ،ایشین انڈر 16 والی بال چیمپئن شپ میں مسلسل پانچویں فتح

جمعرات 17 جولائی 2025 17:16

بنکاک (اُردو پوائنٹ اخبارتازہ ترین - اے پی پی۔ 17 جولائی2025ء) پاکستان کی ٹیم کا ایشین انڈر 16 والی بال چیمپئن شپ میں شاندار کارکردگی کا سلسلہ جاری ہے، دفاعی چیمپئن ایران کو سنسنی خیز مقابلے کے بعد 1-3 سے شکست دے کر مسلسل پانچویں فتح حاصل کرلی۔ پاکستان کی ٹیم ایشین انڈر 16 والی بال چیمپئن شپ کے سیمی فائنل میں پہلے ہی پہنچ چکی ہے۔پاکستان کی جانب سے فیضان اللّٰہ، محمد عرفان ، محمد جنید اور ساران بیگ نے نمایاں کھیل پیش کیا۔

فیضان اللّٰہ نے 21 اٹیک پوائنٹس سمیت 23 پوائنٹس حاصل کیے جبکہ عرفان نے 16 پوائنٹس بناکر اپنی ٹیم کی فتح میں اہم کردار ادا کیا۔ تھائی لینڈ میں جاری ایونٹ میں ناقابل شکست پاکستان کی ٹیم نے ایران کے خلاف پانچویں میچ میں عمدہ کھیل پیش کرتے ہوئے 1-3 سیٹس سے کامیابی حاصل کی۔

(جاری ہے)

پاکستان اور ایران کے درمیان میچ دو گھنٹے سے زائد وقت تک جاری رہا، ایران کے خلاف پاکستان کی جیت کا سکور23-25، 19-25، 25-22 اور 29-31 رہا۔

میچ میں مجموعی طور پر پاکستان نے ایران پر اٹیک پوائنٹس میں 44-51 اور بلاک پوائنٹس میں 11-15 سے سبقت رکھی جبکہ سروس پوائنٹس میں ایران بہتر رہا۔کراس اوور راؤنڈ کے دونوں میچز جیت کر پاکستان اس مرحلے کے گروپ ایف میں ٹاپ پر رہا جبکہ کوریا کے خلاف پہلے راؤنڈ کی جیت کے پوائنٹس پاکستان نے کیری فارورڈ کیے تھے۔پاکستان پہلے ہی ایونٹ کے سیمی فائنل میں اپنی جگہ پکی کر چکا ہے جہاں اس کا مقابلہ بھارت یا جاپان سے ہو گا۔پاکستان سیمی فائنل میں جگہ بنانے والی پہلی ٹیم ہے۔قبل ازیں چیمپئن شپ میں پاکستان انڈر 16 والی بال ٹیم نے گروپ ڈی میں کوریا اور سعودی عرب کو شکست دینے کے بعد چائینیز تائپے کو بھی مات دی تھی۔\932