باغبانوں کو میدانی علاقوں میں میری گولڈ کی کاشت اگست میں مکمل کرنے کی سفارش

جمعہ 18 جولائی 2025 14:20

فیصل آباد (اُردو پوائنٹ اخبارتازہ ترین - اے پی پی۔ 18 جولائی2025ء) پھولوں کے باغبانوں کو میدانی علاقوں میں میری گولڈ نامی خوبصورت پھول کی کاشت فوری شروع کرکے اگست میں مکمل کرنے کی ہدائت کی گئی ہے اور کہاگیا ہے کہ میری گولڈ ایک خوبصورت پھول ہے جوکہ قدیم وقتوں سے برصغیر پا ک و ہند میں کاشت کیا جارہاہے جبکہ میری گولڈ پاکستان میں سب سے زیادہ کاشت کیا جانے والا پھول ہے جسے پھولوں کے ہار بنانے کیلئے استعمال کیا جاتا ہے جس کی پتیوں کو مختلف تقریبات میں استعمال میں لانے سمیت اس کو چمن آرائی کیلئے کیاریوں میں بھی لگایا جاتا ہے۔

جامعہ زرعیہ فیصل آباد کے ماہرین گلبانی و چمن آرائی نے بتایاکہ پیلے اور مالٹے رنگ کے پھولوں کو زیادہ پسند کیا جاتا ہے جن کی کاشت بڑے شہروں کے گرد و نواح میں کی جاتی ہے کیونکہ بڑے شہروں میں اس کے پھولوں کی طلب زیادہ ہے۔

(جاری ہے)

انہوں نے بتایاکہ مختلف مذہبی و معاشرتی تہواروں میں استعمال ہونے کی وجہ سے میری گولڈ کے پھولوں کو بہت اہمیت حاصل ہے جبکہ میری گولڈ کے پھول اپنے خوبصورت رنگ کی وجہ سے پارکوں،چوراہوں اور گرین بیلٹس کی سجاوٹ کیلئے بھی استعمال کئے جاتے ہیں۔

انہوں نے بتایاکہ اس کے پھل میں پائے جانیوالے اجزا آنکھوں کی بیماریوں اور خون کو صاف کرنے کیلئے بھی استعمال ہوتے ہیں نیز اس کے پتوں سے نکلنے والے اجزا سے السر کا علاج کیا جاتا ہے اسی طرح میری گولڈ کے پھولوں کو نیما ٹوڈ،فنجائی اور بیکٹیر یا سے پھیلنے والی بیماریوں کے کنٹرول کیلئے بھی استعمال کیا جاتا ہے۔انہوں نے بتایاکہ میری گولڈکو سالہاسال سے پاکستان میں کاشت کیا جارہا ہے جس کے بڑے اور برابر سائز کے پھول حاصل کرنے کیلئے ہائبرڈ اقسام کو کاشت کیا جاتا ہے جن میں سے ایک کو فرنچ میری گولڈ کہتے ہیں جس کے پھول چھوٹے ہوتے ہیں اور یہ اس کی اگیتی قسم ہے۔

انہوں نے بتایاکہ دوسری قسم کو افریقن میری گولڈ کہا جاتا ہے جس کے پھول بڑے سائز کے ہوتے ہیں اور افریقن میری گولڈ کی قسم کریکر جیک کمرشل کاشت کیلئے نہایت موزوں ہے۔انہوں نے بتایاکہ میدانی علاقوں میں میری گولڈ کی کاشت اگست،ستمبر جبکہ پہاڑی علاقوں میں مارچ،اپریل میں بھی کی جاسکتی ہے۔ انہوں نے بتایاکہ روئیدگی کے تین ماہ بعد پھول لگنے کا عمل شروع ہوجاتا ہے تاہم چمن آرائی میں استعمال کیلئے اس کے بیج کی بوائی اگست کے ابتدا میں کی جاتی ہے۔