پی ڈی پی کی تکمیل سے اربن فلڈنگ کا سدباب ہوسکے گا‘ وزیر بلدیات

11 شہروں کے پی سی ون منظور، مزید 10 شہروں کے پی سی ون کی منظوری اسی ماہ دے دی جائے گی ہر شہر میں زیر زمین واٹر ٹینک بنا کر بارانی پانی کو ذخیرہ کیا جائے گا‘ ذیشان رفیق

جمعہ 18 جولائی 2025 18:10

لاہور (اُردو پوائنٹ اخبارتازہ ترین - این این آئی۔ 18 جولائی2025ء) وزیراعلی مریم نواز شریف کے پنجاب ڈویلپمنٹ پروگرام (پی ڈی پی) میں پیشرفت کا جائزہ اجلاس وزیر بلدیات ذیشان رفیق کی زیر صدارت سول سیکرٹریٹ میں ہوا۔ سیکرٹری لوکل گورنمنٹ پنجاب شکیل احمد میاں، ایڈیشنل سیکرٹری ڈویلپمنٹ احمر کیفی اور پنجاب میونسپل ڈویلپمنٹ فنڈ کمپنی (پی ایم ڈی ایف سی) کے مینجنگ ڈائریکٹر سید زاہد عزیز نے بھی شرکت کی۔

وزیر بلدیات ذیشان رفیق نے اس بات پر اطمینان کا اظہار کیا کہ پی ڈی پی کے تحت 11 شہروں کے پی سی ون منظور ہوچکے ہیں اور ماہ رواں جولائی میں مزید 10 شہروں کے پی سی ون کی منظوری دے دی جائے گی۔ انہوں نے کہا کہ ابتدائی طور پر 66 شہروں کو منصوبے میں شامل کیا جائے گا جبکہ مرحلہ وار صوبے کے 189 شہروں میں میونسپل سکیمیں مکمل کی جائیں گی۔

(جاری ہے)

وزیر بلدیات نے کہا کہ مزید 36 شہروں کے لئے پی سی ون کی تیاری کا کام تیزی سے جاری ہے۔

پی ڈی پی کے تحت شہروں میں موجودہ انفراسٹرکچر کی بحالی کے ساتھ ڈرینج سسٹم بنایا جائے گا۔ انہوں نے کہا کہ پہلی بار تمام ڈسپوزل سٹیشن سولر انرجی پر منتقل کئے جائیں گے جس سے بجلی کے بلوں میں بچت ہوگی۔ ذیشان رفیق نے کہا کہ ہر شہر میں زیر زمین واٹر ٹینک بنا کر بارانی پانی کو ذخیرہ کیا جائے گا۔ اس میگا پراجیکٹ کی تکمیل سے اربن فلڈنگ کا بڑی حد تک سدباب ہو سکے گا۔

اجلاس کے دوران سیکرٹری لوکل گورنمنٹ شکیل احمد میاں نے پی ایم ڈی ایف سی کو پی سی ون کی تیاری کے عمل میں تیزی لانے کی ہدایت کرتے ہوئے کہا کہ چھوٹے شہروں میں سکیمیں ایک سے ڈیڑھ سال میں مکمل ہو جائیں گی۔ انہوں نے کہا کہ پی ایم یو اور ڈسٹرکٹ مانیٹرنگ کمیٹی منصوبوں کی نگرانی کریں گی۔ اس حوالے سے ضروری اقدامات کئے جا رہے ہیں۔