نیویارک، گلے کی چین پہن کر ایم آر آئی کروانا مریض کو مہنگا پڑگیا

دورانِ اسکین ایم آر آئی کی طاقتور مقناطیسی قوت نے اس شخص کو دبوچ لیا،حالت تشویشناک

ہفتہ 19 جولائی 2025 20:42

نیویارک(اُردو پوائنٹ اخبارتازہ ترین - این این آئی۔ 19 جولائی2025ء)امریکی شہر نیویارک میں ایک شخص کو گلے کی چین کی وجہ سے ایم آر آئی کروانا مہنگا پڑگیا۔غیر ملکی میڈیا کے مطابق ایک 61 سالہ شخص علاج معالجے کے حوالے سے ایم آر آئی کروانے نیویارک کی ناسو کانٹی کی ایک لیب میں پہنچا، اس شخص نے گلے میں ایک چین پہن رکھی تھی، دورانِ اسکین ایم آر آئی کی طاقتور مقناطیسی قوت نے اس شخص کو دبوچ لیا۔

(جاری ہے)

ناسو کانٹی پولیس نے واقعے کے حوالے سے بتایا کہ اس شخص کو اسپتال میں داخل کروادیا گیا ہے، جہاں اس کی حالت تشویشناک ہے۔ حکام نے متاثرہ شخص کا نام ظاہر نہیں کیا ہے۔نیشنل انسٹیٹیوٹ آف بائیومیڈیکل امیجنگ اور بائیو انجینئرنگ کے ذرائع نے امریکی میڈیا کو بتایا کہ ایم آر آئی مشین سے نکلنے والی قوت اتنی شدید ہوتی ہے کہ وہ ہر قسم کے لوہے، فولاد کو کھینچنے کی صلاحیت رکھتی ہے، یہاں تک کے اس کی حدود میں آنے والی ویل چیئر کو بھی کھینچ سکتی ہے۔