حکومت کوئٹہ کی ترقی کے لیے سنجیدہ اقدامات کر رہی ہے، منصوبے عوامی توقعات پر پورا اترنے کیلئے اہم ہیں،کمشنر کوئٹہ شاہزیب خان کاکڑ

کوئٹہ(اُردو پوائنٹ اخبارتازہ ترین - این این آئی۔ 19 جولائی2025ء)کمشنر کوئٹہ ڈویژن شاہزیب خان کاکڑ نے آج شہر کے مختلف علاقوں میں جاری ترقیاتی اور خوبصورتی کے منصوبوں کا تفصیلی دورہ کیا۔ اس موقع پر انہوں نے ایئرپورٹ روڈ کی خوبصورتی، سمنگلی روڈ کی توسیع، نیو سبزل روڈ کی تعمیر، BINUQ سے ایئرپورٹ روڈ تک سڑک کی نئی لائن، سریاب روڈ کی بہتری، انسکمب روڈ کی اپ گریڈیشن، نواکلی مین روڈ اور نواکلی بائی پاس روڈ کی تعمیر، اور ہنہ روڈ کی بحالی جیسے منصوبوں کا معائنہ کیا۔

اس موقع پر ڈپٹی کمشنر کوئٹہ کیپٹن (ر) مہر اللہ بادینی اور ڈائریکٹر ڈوپلیمنٹ کوئٹہ ڈویڑن ظہور احمد بھی ان کے ہمراہ موجود تھے۔اس دوران کوئٹہ ڈویلپمنٹ پیکج (QDP) اور C&W کے نمائندگان نے کمشنر کوئٹہ ڈویڑن کو منصوبوں کے دائرہ کار، پیشرفت اور تکمیل کے شیڈول کے بارے میں تفصیلی بریفنگ دی۔

(جاری ہے)

کمشنر شاہزیب خان کاکڑ نے ان ترقیاتی اسکیموں کی اہمیت کو اجاگر کرتے ہوئے کہا کہ یہ منصوبے شہری سہولیات کی بہتری، ٹریفک کے بہاؤ کو منظم کرنے اور شہر کی مجموعی خوبصورتی میں اضافے کا باعث بنیں گے۔

انہوں نے متعلقہ محکموں کو ہدایت کی کہ وہ کام کی رفتار کو مزید تیز کریں تاکہ تمام اسکیمیں مقررہ وقت میں مکمل کی جا سکیں۔انہوں نے مزید کہا کہ مختلف اداروں کے درمیان باہمی تعاون اور مؤثر رابطہ ناگزیر ہے تاکہ کسی بھی قسم کی رکاوٹ یا تاخیر کو فوری طور پر دور کیا جا سکے۔انہوں نے اس عزم کا اظہار کیا کہ حکومت کوئٹہ شہر کی ترقی کے لیے سنجیدہ اقدامات کر رہی ہے، اور یہ منصوبے عوامی توقعات پر پورا اترنے کے لیے نہایت اہم ہیں۔

شہر کے انفراسٹرکچر کی بہتری اور شہری زندگی کو آسان بنانے کے لیے یہ اقدامات سنگِ میل کی حیثیت رکھتے ہیں۔دریں اثنائ کمشنر کوئٹہ ڈویڑن شاہزیب خان کاکڑ اور ڈپٹی کمشنر کوئٹہ کیپٹن (ر)مہراللہ بادینی نے دفتر چیف منسٹر پیکج برائے کوئٹہ ڈویلپمنٹ (CMPQD) کا دورہ کیا۔دورے کے موقع پر پراجیکٹ ڈائریکٹر انجینئر رفیق احمد بلوچ اور ٹریفک انجنیئر ارین خان بڑیچ نے منصوبے کے تحت جاری ترقیاتی اسکیموں، انفراسٹرکچر کی بہتری، سڑکوں کی تعمیر و بحالی، اور شہری سہولیات کی فراہمی سے متعلق مجموعی پیش رفت پر تفصیلی بریفنگ دی۔

اس موقع پر پراجیکٹ ڈائریکٹر کے ہمراہ ان کی تکنیکی ٹیم بھی موجود تھی۔ یہ دورہ شہری ترقی کے حوالے سے صوبائی حکومت کے عزم اور پراجیکٹ کی کارکردگی کے تسلسل کا مظہر ہے۔