فوڈ سیفٹی ٹیموں کی200 دودھ بردار گاڑیوں کی چیکنگ،خلاف ورزی پر جرمانہ

ہفتہ 19 جولائی 2025 23:50

لاہور (اُردو پوائنٹ اخبارتازہ ترین - اے پی پی۔ 19 جولائی2025ء) پنجاب فوڈ اتھارٹی لاہور کی جانب سے شہر کے داخلی راستوں کی ناکہ بندی کر کے دودھ بردار گاڑیوں کی چیکنگ جاری ہے۔

(جاری ہے)

ترجمان کے مطابق ڈی جی فوڈ اتھارٹی عاصم جاوید کی ہدایت پر لاہور میں آنے والے دودھ کی چیکنگ کے لیے بڑا کریک ڈائون کیا گیا جس میں 200دودھ بردار گاڑیوں کی چیکنگ اور خلاف ورزیوں پر 20 کو 2لاکھ سے زائد کے جرمانے عائد کیے گئے، ترجمان کے مطابق 2لاکھ 18ہزار لٹر سے زائد دودھ کی چیکنگ کر کے 2ہزار 500لٹر ملاوٹی دودھ موقع پر کیے گئے ٹیسٹ فیل ہونے پر تلف کردیا گیا،دودھ میں فیٹ کم اور پانی کی ملاوٹ پائی گئی، ڈی جی فوڈ اتھارٹی نے بتایا کہ علی الصبح گجومتہ، سگیاں، بابوصابو، شاہدرہ، ملتان روڈ اور اڈا پلاٹ سے آنے والے دودھ کی چیکنگ کی گئی، ملاوٹی دودھ لاہور شہر میں مختلف سوسائٹیز میں سپلائی کیا جانا تھا، انہوں نے کہاکہ دودھ جیسی بنیادی غذا میں ملاوٹ سنگین جرم ہے،شہروں میں آنے والے دودھ کی تفصیلی ٹیسٹنگ کے بعد ہی سپلائی کی اجازت دی جاتی ہے،انہوں نے کہاکہ گزشتہ سالوں کی نسبت دودھ تلف شرح میں ریکارڈ کمی بہتری کا منہ بولتا ثبوت ہے،دودھ اور دیگر بنیادی اشیاء کی مانیٹرنگ کے لیے فوڈ سیفٹی اور ویجلنس ٹیمیں متحرک ہیں،ڈی جی فوڈاتھارٹی نے کہاکہ ملاوٹ اور جعلسازی کے خلاف زیرو ٹالرینس کے تحت بلا امتیاز آپریشن جاری رہیں گے۔