پنجاب میں منشیات ڈیلرز کے خلاف بڑے پیمانے پر کریک ڈائون کا فیصلہ

انسداد منشیات فورس کو منشیات کیخلاف آزادانہ آپریشنز، مقدمات کے اندراج ،تفتیش کا اختیار حاصل ہو گا

پیر 21 جولائی 2025 16:54

پنجاب میں منشیات ڈیلرز کے خلاف بڑے پیمانے پر کریک ڈائون کا فیصلہ

لاہور (اُردو پوائنٹ اخبارتازہ ترین - این این آئی۔ 21 جولائی2025ء) پنجاب حکومت نے صوبے میں منشیات فروشوں کے خلاف بڑے پیمانے پرکریک ڈائون کا فیصلہ کر لیا ،منشیات کے دھندے میں ملوث بڑے ڈیلرز کو نشانے پر رکھا جائے گا۔ترجمان کے مطابق منشیات کی خریدوفروخت و سپلائی روکنے کے لئے انسدادِ منشیات فورس کی تربیت مکمل کر لی گئی ہے، جس میں حساس ادارے کے 500سے زائد افسران و اہلکار شامل ہیں، یہ فورس آئندہ دو روز میں فیلڈ میں آپریشنل ہو جائے گی۔

(جاری ہے)

نئی فورس ’’سی سی ڈی‘‘طرز پر کام کرے گی اور اسے منشیات کے خلاف آزادانہ آپریشنز، مقدمات کے اندراج اور تفتیش کا اختیار حاصل ہو گا، انسداد منشیات فورس ڈرگ ڈیلرز کے خلاف ازخود مقدمات درج کر سکے گی۔ذرائع کے مطابق فورس کو جدید انٹیلی جنس سسٹم اور آلات سے لیس کیا جا رہا ہے جبکہ پولیس اور دیگر ادارے بھی معاونت فراہم کریں گے۔حکومت کا کہنا ہے کہ اس اقدام کا مقصد منشیات کی خرید و فروخت اور سپلائی کا مستقل خاتمہ ہے۔