انڈونیشیا ، مسافر کشتی میں آگ بھڑک اٹھی، 5ہلاک، 500افراد کو بچالیا گیا

قریبی ماہی گیروں نے بھی امدادی کارروائیوں میں حصہ لیتے ہوئے متاثرہ افراد کو قریبی جزیروں پر منتقل کیا

پیر 21 جولائی 2025 18:01

جگارتہ(اُردو پوائنٹ اخبارتازہ ترین - این این آئی۔ 21 جولائی2025ء)انڈونیشیا کے ساحلی علاقے سولاویسی کے قریب ایک مسافر بردار کشتی میں آگ لگنے کے نتیجے میں کم از کم 5افراد ہلاک جبکہ 500سے زائد افراد کو محفوظ طریقے سے بچا لیا گیا۔انڈونیشیا کی بحری سیکیورٹی ایجنسی کے مطابق، یہ حادثہ KM Barcelona 5نامی فیری کو پیش آیا جو شمالی سولاویسی کے دارالحکومت ماناڈو کی جانب جا رہی تھی۔

(جاری ہے)

بیان میں کہا گیا کہ پانچ افراد کی ہلاکت کی تصدیق ہوئی ہے، جن میں سے دو کی شناخت تاحال نہیں ہو سکی۔آگ فیری کے پچھلے حصے میں لگی، جس کے بعد کئی مسافروں نے لائف جیکٹ پہن کر سمندر میں چھلانگ لگا دی تاکہ جان بچائی جا سکے۔قریبی ماہی گیروں نے بھی امدادی کارروائیوں میں حصہ لیتے ہوئے متاثرہ افراد کو قریبی جزیروں پر منتقل کیا، جبکہ زخمیوں کو قریبی طبی مراکز میں منتقل کیا گیا۔یہ واقعہ لیکوپنگ کے مشہور تفریحی مقام سے ایک گھنٹے کی مسافت پر پیش آیا۔