بھارتی حکومت نے آپریشن سندور میں اپنی ناکامی چھپانے کے لئے نائب صدر سے زبردستی استعفیٰ لے لیا

منگل 22 جولائی 2025 17:13

نئی دلی (اُردو پوائنٹ اخبارتازہ ترین - اے پی پی۔ 22 جولائی2025ء) بھارتی حکومت نے آپریشن سندور میں اپنی ناکامی چھپانے کے لئے بھارتی نائب صدر سے زبردستی استعفیٰ لے لیا۔ کشمیرمیڈیاسروس کے مطابق آپریشن سندور کی ناکامی پر بھارتی حکومت کو اپوزیشن کے سخت سوالات کا سامنا ہے۔ آپریشن سندور کے حقائق چھپانے کے لئے نائب صدر جگدیپ دھنکھڑ سے زبردستی استعفیٰ لے لیا گیا ہے۔

اپوزیشن نے آپریشن سندور پر لوک سبھا میں کھلی بحث کا مطالبہ کیا تھا ۔ لوک سبھا سے خطاب میں جگدیپ دھنکھڑ نے اپوزیشن کو ایوان میں آپریشن سندور پر کھلی بحث کی یقین دہانی کرائی تھی ۔ بھارتی نائب صدر کے اس بیان کے بعدمودی حکومت نے ان سے زبردستی استعفیٰ لے لیا ہے ۔ نائب صدر جگدیپ دھنکھڑ نے اپنے استعفیٰ میں صحت کے مسائل کا ذکر کیا ہے۔

(جاری ہے)

جگدیپ دھنکھڑ کا استعفیٰ اس بات کا واضح ثبوت ہے کہ بھارتی حکومت آپریشن سندور کے حقائق چھپانے میں مصروف ہے۔

بھارتی حکومت نے ’’آپریشن سندور‘‘سے متعلق حقائق پارلیمنٹ میں پیش کرنے کے اپوزیشن کے مطالبے پر مسلسل خاموشی اختیار کررکھی ہے ۔ نائب صدر کا استعفیٰ اس جانب اشارہ کرتا ہے کہ حکومت لوک سبھا میں اس حساس معاملے پر بات نہیں ہونے دینا چاہتی ۔جگدیپ دھنکھڑ کا مستعفی ہونا مودی حکومت کے ایک منظم دبائو کا نتیجہ ہے تاکہ ’’آپریشن سندور‘‘ کا سچ عوام کے سامنے نہ آ سکے۔ بھارتی میڈیا بھی مودی حکومت کی ناکام پالیسیوں کی وجہ سے سچ عوام کے سامنے آنے سے خوفزدہ ہے ۔