موسم برسات میں احتیاطی تدابیر اختیار کرکے ڈائریا، گیسٹرو سمیت دیگر بیماریوں سے بچا جا سکتا ہے، ڈاکٹر عبدالصبور تہامی

منگل 22 جولائی 2025 18:10

سرگودھا (اُردو پوائنٹ اخبارتازہ ترین - اے پی پی۔ 22 جولائی2025ء) موسمِ برسات میں مختلف بیماریوں اور جراثیم کی افزائش میں اضافہ کی وجہ سے احتیاطی اقدامات پرعملدرآمد کرتے ہوئے شہری برسات میں تازہ ، سادہ ، کم کھانا کھائیں اور پانی صاف اور اُبال کر استعمال کریں تاکہ ڈائریا وگیسٹرو سمیت دیگر بیماریوں سے بچا جا سکے۔ ان خیالات کا اظہارسرگودھا میڈیکل کالج کے پروفیسر ڈاکٹرعبدالصبور تہامی نے ’’اے پی پی‘‘ سے گفتگو کرتے ہوئے کیا ۔

اُنہوں نے کہا کہ مون سون کے دوران برسات کے باعث نمی کی وجہ سے مختلف بیماریوں اور جراثیموں کی افزائش بڑھ جاتی ہےجس سےمتعدی امراض میں اضافہ کا خدشہ ہوتا ہے۔ اُنہوں نے کہا کہ موسمِ برسات میں انسان کو نسبتاً کم خوراک کی ضرورت ہوتی ہے لہٰذا مرغن غذائوں اور زیادہ کھانے سے بد ہضمی اور پیٹ کی دیگر بیماریاں جنم لیتی ہیں۔

(جاری ہے)

ڈاکٹر عبدالصبور تہامی نے کہا کہ مکھیوں، گردوغبار اور نمی کے باعث کھانے پینے کی اشیاء میں آلودگی بڑھ جاتی ہے اور پسینے کی وجہ سے جلد پر پیداہونیوالی نمی پھوڑے پھنسیوں کا بھی باعث بنتی ہے، موسمِ برسات میں گیسٹرو، پیچش، ٹائیفائیڈ بخار، یرقان و دیگر امراض سے بچنے کیلئے احتیاطی تدابیراختیار کی جائیں۔

انہوں نے کہا کہ باتھ رُوم کے استعمال کے بعد اچھی طرح ہاتھ دھوئیں۔ اسی طرح کھانا کھانے سے بیشترصابن سے ہاتھ اچھی طرح دھو لئے جائیں اورکھانے سے پہلے تھوڑا سا پانی پی لیا لیں، زیادہ کھانے سے گریز کریں۔ ڈاکٹرعبدالصبور تہامی نے کہا کہ اگر کسی قسم کی تکلیف ظاہر ہو تو فوری طور پرقریبی مرکزِ صحت، ہسپتال یا مستند ڈاکٹر سے فوری رابطہ کریں۔