Live Updates

اسکردو میں ریچھ کے حملے سے زخمی ہونے کے بعد قرة العین بلوچ کی مداحوں سے دعاؤں کی درخواست

خوش قسمتی سے گوکارہ کی کوئی ہڈی نہیں ٹوٹی اور اپنے زخموں سے صحتیاب ہو رہی ہیں، ڈاکٹروں کی گفتگو

اتوار 7 ستمبر 2025 14:35

اسکردو میں ریچھ کے حملے سے زخمی ہونے کے بعد قرة العین بلوچ کی مداحوں ..

اسکر دو (اُردو پوائنٹ اخبارتازہ ترین - این این آئی۔ 07 ستمبر2025ء)اسکردو میں ریچھ کے حملے میں زخمی ہونے کے بعد گلوکارہ قرة العین بلوچ نے مداحوں سے پرائیویسی اور دعاؤں کی درخواست کی ہے۔قرةالعین بلوچ کی منیجمنٹ ٹیم نے انسٹاگرام پر ایک پیغام جاری کیاجس میں اسکردو کے سفر کے دوران ایک بھورے ریچھ کے حملے کے بعد باضابطہ بیان جاری کرتے ہوئے گلوکارہ کیلئے دعاؤں کی درخواست کی۔

انسٹاگرام پر جاری کیے گئے پیغام کے مطابق قرة العین بلوچ حالیہ سیلاب سے متاثرہ دور دراز دیہات میں لوگوں کی مدد کیلئے کمپریہینسیو ڈیزاسٹر ریسپانس سروسز (سی ڈی آر ایس) کے ساتھ کام کرتے ہوئے گلگت بلتستان میں موجود تھیں۔بیان میں کہا گیا کہ 4 ستمبر کی رات جب وہ اپنے خیمے میں سو رہی تھیں تو ان پر ایک بھورے ریچھ نے حملہ کر دیا، تاہم سی ڈی آر ایس کی ٹیم نے فوری کارروائی کرتے ہوئے ریچھ کو بھگا دیا۔

(جاری ہے)

گلوکارہ کو فوری طور پر قریبی ہسپتال منتقل کیا گیا، جہاں ڈاکٹرز نے انہیں خطرے سے باہر قرار دیا، خوش قسمتی سے کوئی ہڈی نہیں ٹوٹی اور وہ اپنے زخموں سے صحتیاب ہو رہی ہیں۔ان کی ٹیم نے کہا کہ اس وقت گلوکارہ کو آرام اور پرائیویسی کی ضرورت ہے، ان کی تمام عوامی مصروفیات صحتیابی تک مؤخر کر دی گئی ہیں اور ساتھ ہی مداحوں سے ان کی صحت کے لیے دعاؤں کی درخواست بھی کی گئی۔

یہ واقعہ گلگت بلتستان کے دیوسائی نیشنل پارک میں پیش آیا، جو بلند و بالا سطح مرتفع پر واقع ہے اور نایاب ہمالیائی بھورے ریچھوں کا مسکن ہے۔محکمہ جنگلی حیات کے عملے اور مقامی افراد نے بروقت کارروائی کرتے ہوئے گلوکارہ کو بچایا اور انہیں آر ایچ کیو ہسپتال اسکردو منتقل کیا۔گلگت بلتستان پولیس کے مطابق قرةالعین بلوچ اپنے دو ساتھیوں کے ساتھ دیوسائی کے کیمپنگ ایریا میں موجود تھیں، جب اچانک ایک بھورا ریچھ حملہ آور ہوا اور ان کے دونوں بازو زخمی کر دیے، تاہم ان کا کیمرہ مین اور دوسرا ساتھی محفوظ رہے۔بعد ازاں پولیس نے واقعے کی تحقیقات شروع کر دیں۔