Live Updates

سیلاب زدگان کو بجلی کے بلز ،ٹیکسز میں خصوصی رعایت دی جائے گی‘ پنجاب حکومت

امداد کے لیے باقاعدہ پیکج کا اعلان کیا جائے گا، پانی اترنے پر نقصانات کے تخمینے کے بعد آغاز کیا جائیگا‘ وزی خززانہ مجتبیٰ شجاع الرحمن

اتوار 7 ستمبر 2025 17:15

سیلاب زدگان کو بجلی کے بلز ،ٹیکسز میں خصوصی رعایت دی جائے گی‘ پنجاب ..

لاہور(اُردو پوائنٹ اخبارتازہ ترین - این این آئی۔ 07 ستمبر2025ء) سیلاب زدگان کو بجلی کے بلز اور ٹیکسز میں خصوصی رعایت دی جائے گی، امداد کے لیے باقاعدہ پیکج کا اعلان کیا جائے گا، متاثرین کی بحالی کا عمل پانی اترنے پر نقصانات کے تخمینے کے بعد آغاز کیا جائے گا، متاثرہ علاقوں سے سیلاب زدگان کو فلڈ ریلیف کیمپس تک لایا جا رہا ہے جہاں انہیںقیام و طعام اور علاج معالجے کی بہترین سہولیات میسر ہیں، امدادی کاروائیوں میں صرف سرکاری ادارے ہی نہیں سول سوسائٹی اور نان گورنمنٹ آرگنائزیشنز بھی سر گرم عمل ہیں ۔

ان خیالات کا اظہار وزیر خزانہ پنجاب مجتبیٰشجاع الرحمان نے فیض پور کلاں اور چوہنگ میں فلڈ ریلیف کیمپس کے دورہِ کے موقع پر کیا ۔صوبائی وزیر مجتبیٰ شجاع الرحمن نے کیمپس میں منعقدہ عید میلاد النبی کی تقریبات میں بھی شرکت کی جہاں انہوں نے وطن عزیز کی سلامتی اور سیلاب زدگان کی بحالی کے لیے دعائیں کروائیں۔

(جاری ہے)

متاثرین کی دلجوئی کی اور ان میں تبرک تقسیم کیا۔

بعد ازاں صوبائی وزیرنے لاہور دہلی گیٹ میں عید میلاد النبی کے مرکزی جلوس میں بھی شرکت کی ۔ عید میلاد النبی کی تقریبات سے خطاب کرتے ہوئے صوبائی وزیر نے بتایا کہ اس سال نبی کریم صلی اللہ علیہ وآلہ وسلم کے 1500سال ویں یوم ولادت پر پنجاب حکومت کی جانب سے ربیع الاول کے پورے مہینے میں تقریبات کے انعقاد کا اعلان کیا گیا ہے ۔ تقریبات میں نوجوان نسل کی تربیت کے لیے نبی کریم کی شخصیت اور تعلیمات پر روشنی ڈالی جائے گی۔

رسول اکرم صلی اللہ علیہ وآلہ وسلم کی پوری زندگی ہمارے لیے نمونہ حیات ہے۔ پاکستان دنیا کا پہلا ملک ہے جس کی بنیاد کلمہ طیبہ پر ہے .اب ہمیں نبی کریم رحمت اللعالمین کے کے امتی ہونے کا حق ادا کرنا ہے اور وطن عزیز کو ایسی ریاست کے طور پر پروان چڑھانا ہے جہاں امن و امان ہو ، مساوات ہو بھائی چارہ ہو ۔ سیلاب زدگان کی بحالی ہم سب کی مشترکہ ذمہ داری ہے ہمیں اپنی اس ذمہ داری کو احسن طریقے سے پورا کرنا ہے ۔