Live Updates

مون سون بارشوں کا دسواں سپیل شروع ،9ستمبر تک جاری رہنے کا امکان ہے ، ترجمان پی ڈی ایم اے

اتوار 7 ستمبر 2025 14:40

لاہور (اُردو پوائنٹ اخبارتازہ ترین - اے پی پی۔ 07 ستمبر2025ء) بارشوں کا دسواں سپیل شروع ہو گیا ہے ،آئندہ 24 گھنٹوں میں پنجاب کے بیشتر اضلاع میں مزید شدید طوفانی بارشوں کی پیشگوئی، مون سون بارشوں کا 10واں سپیل 9 ستمبر تک جاری رہے گا۔ ترجمان پی ڈی ایم اے کے مطابق گزشتہ 24 گھنٹوں میں صوبائی دارالحکومت لاہور سمیت پنجاب کے بیشتر اضلاع میں مون سون بارش ریکارڈ کی گئی۔

منگلا میں 72 ملی میٹر، جہلم 40، مری 08، ملتان 4، بہاولپور 3، لاہور اور شیخوپورہ 2، منڈی بہائوالدین اور نارووال میں1 ملی میٹر تک بارش ریکارڈ کی گئی، اسی طرح سیالکوٹ، سرگودھا، ٹوبہ ٹیک سنگھ، لیہ، ساہیوال، فیصل آباد اور اوکاڑہ میں بھی بارش ریکارڈ کی گئی ۔ترجمان کے مطابق مون سون بارشوں کا 10واں اسپیل 9 ستمبر تک جاری رہے گا ، اس دوران لاہور ،راولپنڈی مری ،گلیات ،اٹک، چکوال جہلم، گوجرانولہ، گجرات ،سیالکوٹ ،نارووال، حافظ آباد، منڈی بہائوالدین، اوکاڑہ، ساہیوال، قصور، جھنگ، سرگودھا، میانوالی ،ڈیرہ غازی خان، ملتان اور راجن پور میں بھی بارشوں کا امکان ہے ۔

(جاری ہے)

ترجمان کے مطابق9 ستمبر تک ڈیرہ غازی خان رودکوہیوں میں فلیش فلڈنگ کا خدشہ اورپی ڈی ایم اے پنجاب کی جانب سے صوبہ بھر کے کمشنرز و ڈپٹی کمشنرز کو الرٹ رہنے کی ہدایات جاری کر دی گئی ہیں ۔ ڈی جی پی ڈی ایم اے عرفان علی کاٹھیا نے کہا ہے کہ مون سون بارشوں کے باعث دریائے چناب، راوی اور ستلج میں سیلابی صورتحال کا سامنا جبکہ بڑے شہروں میں ندی نالے بھی بپھر سکتے ہیں۔

انہوں نے کہا کہ اس حوالے سے کمشنر ز، ڈپٹی کمشنرز اور دیگر افسران الرٹ ہیں، محکمہ صحت ، آبپاشی ، تعمیر و مواصلات ،لوکل گورنمنٹ اور محکمہ لایئو سٹاک کو بھی الرٹ جاری کردیا گیا ہے ۔ انہوں نے شہریوں سے اپیل کی کہ وہ خراب موسم کی صورتحال میں احتیاطی تدابیر اختیار اور دریائوں کے اطراف اکٹھے ہونے وسیرو تفریح سے گریز کریں،آ ندھی و طوفان کی صورتحال میں محفوظ مقامات پر رہیں اورایمرجنسی صورتحال میں پی ڈی ایم اے ہیلپ لائن 1129 پر رابطہ کریں۔