ڈی جی سپورٹس پنجاب سے ایشین انڈر 16والی بال چیمپئن شپ کی فاتح ٹیم کے کھلاڑیوں کی ملاقات،کھلاڑیوں کو ایک سال تک سکالرشپ دینے کا اعلان

منگل 22 جولائی 2025 22:30

لاہور (اُردو پوائنٹ اخبارتازہ ترین - اے پی پی۔ 22 جولائی2025ء) ڈائریکٹرجنرل سپورٹس پنجاب خضرافضال چوہدری سے ایشین انڈر 16والی بال چیمپئن شپ ٹائٹل جیتنے والی ٹیم کے کھلاڑیوں نے منگل کے روز نیشنل ہاکی سٹیڈیم میں ملاقات کی ہے۔ڈی جی سپورٹس پنجاب نے ملاقات کے موقع پر ایشین انڈر16والی بال جیتنے والے پنجاب کے کھلاڑیوں کیلئے ایک سال تک سکالرشپ دینے کا اعلان کیا۔

(جاری ہے)

ڈی جی سپورٹس نے اس موقع پرکہا کہ انڈر 16والی بال چیمپئن شپ میں قومی ٹیم کے کھلاڑیوں کو شاندار کامیابی پر مبادکباد دیتا ہوں، سپورٹس انڈوومنٹ فنڈ سے پنجاب کے کھلاڑیوں کو پلاٹینم کیٹیگری سے 70ہزار روپے ماہانہ دیئے جائیں گے،انہوں نے کھلاڑیوں کو کہا کہ آپ جیسے ٹیلنٹ کی رہنمائی اور حوصلہ افزائی ہماری اولین ترجیح ہے، کھلاڑیوں نے جذبے ،مہارت اور ٹیم ورک سے تاریخ رقم کی ہے۔

خضرافضال چوہدری نے اس امید کا اظہار کیا کہ مجھے یقین ہے کہ ہمارایہی ٹیلنٹ عالمی سطح پر ملک کا نام روشن کرتا رہے گا، انڈر 16والی بال چیمپئن شپ کے فائنل میں ایران جیسی مضبوط ٹیم کو شکست دینا بڑا کارنامہ ہے۔ملاقات کے موقع پرڈائریکٹر ایڈمن ڈاکٹر محمد کلیم، ڈائریکٹر سپورٹس رانا ندیم انجم، قومی انڈر16والی بال ٹیم کوچ کفایت اللہ ودیگر آفیشلزبھی موجودتھے۔