وزیراعلی پنجاب کی سیلاب سے پیدا ہونے والی صورتحال کا جائزہ لینے کیلئے ننکانہ صاحب آمد

لاہور (اُردو پوائنٹ اخبارتازہ ترین - اے پی پی۔ 23 جولائی2025ء) وزیراعلی پنجاب مریم نواز سیلاب سے پیدا ہونے والی صورتحال کا جائزہ لینے کے لئے ننکانہ صاحب کے دیہات پہنچ گئیں۔ وزیراعلی نے ننکانہ صاحب میں سیلابی ریلوں سے بچائوکیلئے دو فلڈ ڈرین بنانے کا اعلان کیا۔انہوں نے ننکانہ صاحب کی روڈ ز اور دیگر ترقیاتی منصوبوں کی جلد تکمیل کی ہدایت کی۔

انہوں نے ننکانہ صاحب کی بیوٹی فکیشن کا پلان دو ہفتے میں طلب کیا اوراس کیلئے فنڈز کے جلد از جلد اجرا کی ہدایت کی۔ انہوں نے ضلع ننکانہ صاحب کیلئے الیکٹرک بسوں کی تعداد بڑھانے کا اعلان بھی کیا۔ وزیراعلی کا ننکانہ صاحب کو ماڈل سٹی بنانے کے عزم کااعادہ کیا۔ وزیراعلی نے سکول کے سامنے زیبرا کراسنگ اور سائن بورڈ یقینی بنانے کی ہدایت کی اور روٹی کے نرخ کنٹرول کرنے کا حکم دیا۔

(جاری ہے)

انہوں نے ننکانہ صاحب کیلئے کلینک آن ویل کی تعداد بڑھانے کا حکم دیا اور شہر کے داخلی راستوں، روڈز کو بہتر بنانے اور شہر کی مرکزی سڑک کے اطراف میں بہترین شولڈر بنانے کی ہدایت کی۔انہوں نے ڈفرکھوکھراں اور دیگر دیہات کو مثالی گاں سکیم میں شامل کرنے کا حکم دیا۔ مریم نوازنے جسلانی موڑ میں سیلاب سے متاثرہ علاقوں کا دورہ کیااور سیلاب سے متاثرہ گھروں اور زرعی اراضی کا معائنہ کیا۔

انہوں نے میراں پور گاں میں پی ڈی ایم اے کی جانب سے امدادی سامان کی تقسیم کا آغاز کیا۔ پی ڈی ایم اے سیلابی ریلے سے متاثرہ خاندانوں کو خصوصی کٹ، مچھر دانی اور ملبوسات فراہم کررہی ہے۔ انہوں نے سیلاب متاثرین سے ملاقات اور بات چیت کی۔ بزرگ خواتین نے مثالی گاوں بنانے کے اعلان پر وزیرعلی مریم نوازکودعائیں دیں۔ انہوںنے سب خواتین سے باری باری ہاتھ ملایا اور کہا کہ تہانوں ملن آئی آں، تے گلاں وی کر نیاں نے۔

انہوں نے ننکانہ صاحب کے علاقے دھولار چوک،گردوارہ جنم استھان چوک، ڈی پی ایس چوک، بیری چوک، چونگی چوک، ریلوے روڈ، پیرا حمد شاہ روڈ اور مانانوالہ پھاٹک کے علاقوں کا بھی دورہ کیا۔ وزیراعلی کو دیکھ کر عوام کا جم غفیر لگ گیا اور بچے وزیراعلی کے پاس آگئے۔ وزیراعلی نے بچوں کو سویٹس کے تحائف پیش کیے،بچوں سے بات چیت کی، پیار اور شفقت کا مظاہرہ کیا جس پر بچے خو شی سے نہال ہوگئے۔

وزیراعلی نے عوام سے سیلابی ریلوں اور بارشوں پر انتظامیہ کے اقدامات کے بارے میں دریافت کیا۔انہوں نے ڈی سی آفس میں ننکانہ صاحب کے ارکان پارلیمنٹ سے ملاقات کی۔ ڈپٹی کمشنر ننکانہ نے سیلابی صورتحال اور جاری ترقیاتی منصوبوں پر تفصیلی بریفنگ دی۔ بریفنگ میں بتایا گیا کہ ننکانہ صاحب میں ندی نالے اور نہروں کے اوور فلو ہونے سے 1525ایکڑ رقبہ زیر آب آگیا۔

ننکانہ صاحب میں 22دیہات سیلاب کی وجہ سے متاثر ہوئے۔ 20ہزار سے زائد تجاوزات کا خاتمہ کیا گیا۔1194سپیشل افراد کوہمت کارڈ دیئے۔ انہوں نے ننکانہ صاحب میں ہمت کارڈ کے مستفید افراد کی تعداد بڑھانے کا حکم دیا۔ ننکانہ صاحب میں اپنی چھت، اپنا گھر پراجیکٹ کے تحت788لون جاری کیے جا چکے اور 400گھر زیر تعمیر ہیں۔ سبسڈی پر176گرین ٹریکٹر ز دیئے گئے، گندم کے کاشتکاروں کو بیس ٹریکٹرز مفت ملے۔

ننکانہ صاحب میں 267لائیو سٹاک، 1715منیارٹی کارڈدئیے گئے اور 242زرعی ٹیوب ویل سولر سکیم میں شامل ہیں۔انہوں نے کہا کہ سیلابی ریلوں سے متاثرہ فصلوں اور لائیو سٹاک کے نقصان کا ازالہ کریں گے۔سیلابی ریلے سے گرنے والے کچے گھروں کے مکینوں کی مالی معاونت کی جائے گی۔کسی جگہ پر قبضہ ہونا متعلقہ ڈپٹی کمشنر اور کمشنر کی ناکامی ہے۔ انہوںنے کہا کہ ماضی میں پنجاب کے کے ساتھ جو سلوک روا رکھا گیا، دیکھ کر دل کڑھتا ہے۔ عوام کے مسائل کے حل کیلئے مجھے بہت زیادہ فکرہوتی ہے، عوام کی خدمت مہربانی نہیں، میرا فرض ہے۔