پنجاب فوڈ اتھارٹی کا گرینڈ آپریشن ،80ہزار کلو ایکسپائر، بدبودار فروزن ریڈی ٹو کک گوشت تلف ،ملزم گرفتار

معاونِ خصوصی وزیر اعلی سلمی بٹ کی فوڈ سیفٹی ٹیموں کے ہمراہ کارروائی ،بدرنگ بدبودار مضر صحت گوشت کولڈ سٹور میں بوریوں میں ڈال کر رکھا گیا تھا

جمعرات 24 جولائی 2025 16:38

لاہور(اُردو پوائنٹ اخبارتازہ ترین - این این آئی۔ 24 جولائی2025ء) کولڈ سٹور کی آڑھ میں انسانی صحت پر بڑا وار کرنے والوں کے خلاف پنجاب فوڈ اتھارٹی کا گرینڈ آپریشن ،80ہزار کلو ایکسپائر، بدبودار فروزن ریڈی ٹو کک گوشت تلف ،مقدمہ درج، ملزم کو گرفتار کر لیا گیا ۔ معاونِ خصوصی وزیر اعلی پنجاب سلمی بٹ نے فوڈ سیفٹی ٹیموں کے ہمراہ اومیگا ٹائون فیروز والا میں کریک ڈائون کیا ۔

انہوں نے بتایاکہ کلیجی، ونگز،لیگ پیس،اوجھڑیاں، گردن، پنچے اور ریڈی ٹو کک پروڈکٹس بوریوں میں رکھی پائی گئیں،بدرنگ بدبودار مضر صحت گوشت کولڈ سٹور میں بوریوں میں ڈال کر رکھا گیا تھا، کولڈ سٹور میں نامناسب درجہ حرارت میں سٹور کیا گیا انسانی استعمال کے لیے موزوں نہ تھا، ناقص میٹ معروف فوڈ چینز، مارٹس اور بڑے ریسٹورنٹس پر سپلائی کیا جانا تھا۔

(جاری ہے)

سلمیٰ بٹ نے بتایا کہ صفائی کے ناقص انتظامات، ایس او پیز کے خلاف سٹوریج کے بریحالات پائے گئے، انتہائی لازم ٹمپریچر کنڑول سسٹم اور خرید و فروخت ریکارڈ بھی عدم موجود پایا گیا۔تلف کردہ گوشت کا کھانے میں استعمال انسانی صحت کیلئے مضر ثابت ہو سکتا تھا، پنجاب فوڈاتھارٹی کی بر وقت کارروائی نے انسانی صحت سے کھیلنے والوں کیخلاف سخت ایکشن لیا۔

معاون خصوصی وزیر اعلی پنجاب نے کہا کہ سفارش یا خوف بالکل بھی نہیں، غذائی دہشتگردوں کے لیے قانون حرکت میں آئے گا، مقرر کردہ قوانین پر عمل پیرا ہوں ورنہ کاروبار کی ہرگز اجازت نہیں دی جائے گی، ناجائز منافع کی لالچ میں صحت کیساتھ کھلواڑ کرنے والوں کے کے کوئی رعایت نہیں، وزیر اعلی پنجاب کے حکم پر صحت دشمنوں کے کاروبار بند کر دیئے جائیں گے۔