بھارتی ٹیم کو ایشیا کپ کھیلنے کی اجازت مل گئی

ٹورنامنٹ کے باضابطہ شیڈول کا اعلان 48 گھنٹوں میں متوقع

ذیشان مہتاب ہفتہ 26 جولائی 2025 15:06

بھارتی ٹیم کو ایشیا کپ کھیلنے کی اجازت مل گئی

لاہور (اردو پوائنٹ تازہ ترین اخبار ۔ 26 جولائی 2025ء ) ایشین کرکٹ کونسل (اے سی سی) کی جانب سے ایشیا کپ 2025ء کا شیڈول جلد جاری کیے جانے کا امکان ہے۔

تفصیلات کے مطابق کرکٹ ایشیا کپ کے انعقاد میں تمام رکاوٹیں دور ہوگئیں، ذرائع کا کہنا ہے بھارتی بورڈ کو حکومت کی طرف سے ایشیا کپ کھیلنے کی اجازت مل گئی۔

(جاری ہے)

کرکٹ ویب سائٹ کے مطابق ایشیا کپ سے متعلق تمام معاملات حل ہوگئے ہیں اور شیڈول آئندہ 24 سے 48 گھنٹوں میں جاری کیا جا سکتا ہے، اجلاس میں بھارتی کرکٹ بورڈ (بی سی سی آئی) نے شیڈول پر وقت مانگا تھا۔

ایشیا کپ میں کل آٹھ ٹیمیں شرکت کریں گی اور ٹورنامنٹ کی مجوزہ ونڈو 10 سے 28 ستمبر کے درمیان رکھی گئی ہے، مجوزہ شیڈول میں معمولی رد و بدل کا امکان ہے جبکہ میچز متحدہ عرب امارات کے دو شہروں دبئی اور ابوظہبی میں رکھے گئے ہیں۔

ذرائع کا یہ بھی کہنا ہے کہ ایشیا کپ کے شیڈول کے حوالے سے ابتدائی اعلان آج کسی بھی وقت متوقع ہے۔