نقوی کا ہیڈ کوارٹرز نارتھ فرنٹیئر کور بلوچستان کا دورہ، یادگار شہداء پرحاضری ، پھول رکھے،فاتحہ خوانی کی

فرنٹیئر کور بلوچستان نارتھ مایہ ناز فورس،قیام امن کیلئے قربانیاں انمٹ ہیں، محسن نقوی کی بات چیت

اتوار 27 جولائی 2025 17:50

کوئٹہ(اُردو پوائنٹ اخبارتازہ ترین - این این آئی۔ 27 جولائی2025ء) وفاقی وزیرداخلہ محسن نقوی نے ہیڈ کوارٹرز نارتھ فرنٹیئر کور بلوچستان کا دورہ کیا۔ وزیرداخلہ محسن نقوی کو ایف سی بلوچستان نارتھ کے چاک و چوبند دستے نے سلامی پیش کی، فرنٹیئر کور بلوچستان نارتھ کے آئی جی میجر جنرل عابد مظہر نے وفاقی وزیر داخلہ محسن نقوی کا افسران سے تعارف کرایا۔

وفاقی وزیرداخلہ محسن نقوی نے یادگار شہداء پر حاضری دی، یادگار شہداء پر پھول رکھے اور فاتحہ خوانی کی۔ وفاقی وزیرداخلہ محسن نقوی نے ایف سی بلوچستان نارتھ کے شہداء کے درجات کی بلندی کے لئے دعا کی اور شہداء کی قربانیوں کو خراج عقیدت پیش کیا۔ آئی جی ایف سی بلوچستان نارتھ میجر جنرل عابد مظہر نے فورس کی تربیت اور پیشہ وارانہ صلاحیتوں کے بارے میں بریفنگ دی۔

(جاری ہے)

وفاقی وزیرداخلہ نے بلوچستان میں قیام امن کیلئے فرنٹیئر کور نارتھ کے گراں قدر خدمات کو سراہتے ہوئے کہا کہ فرنٹیئر کور بلوچستان نارتھ مایہ ناز فورس ہے، ایف سی بلوچستان نارتھ کی قیام امن کیلئے قربانیاں انمٹ ہیں۔ انہوں نے مزید کہا کہ فتنہ الہندوستان کے مذموم عزائم ناکام بنانے میں اس فورس کے افسروں اور جوانوں نے شجاعت کی تاریخ رقم کی ہے۔ انہوں نے کہا کہ فرنٹیئر کور بلوچستان نارتھ کے افسران اور جوانوں کی پیشہ وارانہ مہارت اور بہادری پر ناز ہے۔