نسل نو میں مثبت رجحانات کے فروغ کے لئے کھیل کے میدانوں کو آباد کرنا ہو گا ،ڈسٹرکٹ سپورٹ آفیسر سرگودھا

سیلف ڈیفنس کے نظریہ سے بچوں کے ساتھ بچیوں کا کراٹے جیسے کھیل سے وابستہ ہونا ہر لحاظ سے خوش آئند ہے،صائمہ منظور

اتوار 27 جولائی 2025 19:00

سرگودھا(اُردو پوائنٹ اخبارتازہ ترین - این این آئی۔ 27 جولائی2025ء)ڈسٹرکٹ سپورٹس آفیسر صائمہ منظور نے کہا کہ نسل نو میں مثبت رجحانات کے فروغ کے لئے کھیل کے میدانوں کو آباد کرنا ہو گا جن میں جوڈو اورکراٹے جیسے دفاعی کھیل نہ صرف انسانی صحت کیلئے زیادہ موزوں ہیں بلکہ ان سے نوجوانوں طلبا و طالبات میں خود اعتمادی پیدا ہوتی ہے۔زرائع کے مطابق ڈسٹرکٹ سپورٹس آفیسر صائمہ منظور نے ڈویژنل کراٹے چیمپئین شپ میں خطاب کرتے ہوئے کہا کہ سیلف ڈیفنس کے نظریہ سے بچوں کے ساتھ بچیوں کا کراٹے جیسے کھیل سے وابستہ ہونا ہر لحاظ سے خوش آئند ہے اور اس حوالہ سے عملی اقدامات کے فروغ پرچیئرمین کراٹے ایسوسی ایشن امیر افضل اعوان اور ان کی ٹیم مبارکباد کے حقدار ہیں۔

ان کا کہنا تھا کہ ہمیں اپنے بچوں کو منفی رجحانات سے بچانے کیلئے انہیں کھیلوں کی طرف راغب کرنا ہوگا۔

(جاری ہے)

ڈویژنل چیئرمین کراٹے ایسوسی ایش سرگودھا امیر افضل اعوان نے کہا کہ پاکستان میں کھیلوں کے فروغ کے لئے اقدامات میں ہم ہر ممکنہ کردار ادا کر رہے ہیں، سرگودھا کے طلبا اور طالبات کراٹے کے کھیل میں نہ صرف مقامی و ملکی بلکہ غیر ملکی سطح پر اپنی خداداد صلاحیتوں کا لوہا منوا رہے ہیں اور یہ کام جاری رہے گا، کراٹے کے نیشنل کوچ ظہور احمد نے بتایا کہ ڈویژنل کراٹے چیمپئین شپ میں سرگودھا کے چاروں اضلاع سے 150 سے زائد لڑکوں اور لڑکیوں نے حصہ لیا جن میں نمایاں کارکردگی کا مظاہرہ کرنے والے کھلاڑی صوبائی و ملکی سطح کے ٹورنامنٹ میں حصہ لیں گے اور عالمی سطح پرکامیابی کے جھنڈے گاڑ کر ملک و قوم کا نام روشن کریں گے۔

آخر میں چیمپئین شپ میں نمایاں کاکردگی کا مظاہرہ کرنے والے کھلاڑیوں میں انعامات تقسیم کئے گئے۔