کراچی میں تالا توڑ گروہ نے گلشن حدید میں تالے توڑپر5 دکانوں کا صفایاکردیا

پیر 28 جولائی 2025 17:08

کراچی(اُردو پوائنٹ اخبارتازہ ترین - این این آئی۔ 28 جولائی2025ء)شہر قائد میں تالا توڑ گروہ نے ایک بڑی واردات کی ہے، جس میں اس نے 5 دکانیں لوٹ لیں۔پولیس حکام نے اطلاع دی ہے کہ کراچی کے ضلع ملیر، گلشن حدید میں تالا توڑ گروہ متحرک ہو گیا ہے، جس نے ایک واردات میں فیز ون کی مارکیٹ میں پانچ دکانوں کا صفایا کر ڈالا ہے۔

(جاری ہے)

پولیس حکام کے مطابق واردات 5 رکنی گینگ نے کی ہے، گلشن حدید فیز ون کی مارکیٹ میں ڈاکوئوں نے پہنچتے ہی سیکیورٹی گارڈ کو قابو کر لیا، اور اسے رسیوں سے باندھ کر سائیڈ میں بے بس کر دیا۔

پولیس نے نشان دہی کی کہ ڈاکوئوں نے واردات میں مارکیٹ کی پانچ بڑی دکانوں کو نشانہ بنایا ہے، جن میں موبائل فون شاپ، جیولری، اور کریانہ اسٹور کو لوٹا گیا، ان دکانوں میں کیش، موبائل فونز، اور سونا موجود تھا۔حکام نے کہاکہ دکانوں سے دیگر قمیتی سامان بھی چوری کیا گیا ہے، پولیس کو جیسے ہی واردات کی اطلاع ملی، نفری موقع پر پہنچ گئی، مجموعی طور پر ڈکیتی کے دوران نقصان کا ابھی اندازہ نہیں لگایا جا سکا ہے، متاثرہ دکان دار تمام نقصانات کا جائزہ لے کر بتائیں گے۔