میری بیٹی کو 24 گھنٹوں میں 2 باردل کا دورہ پڑا ، عینی خالد نے تصاویر شیئر کردیں

بدھ 30 جولائی 2025 20:05

کراچی (اُردو پوائنٹ اخبارتازہ ترین - این این آئی۔ 30 جولائی2025ء)سابق گلوکارہ عینی خالد نے انکشاف کیا ہے کہ میری7سالہ بیٹی کو 24گھنٹوں کے دوران 2بار دل کا دورہ پڑا۔عینی خالد نے فوٹوز انسٹاگرام پر پوسٹ میں اپنی بیٹی عیشا کے بہادری کے سفر کی داستان سنائی سناتے ہوئے بتایا کہ میں یقین نہیں کر سکتی کہ آخر کار مجھ میں یہ پوسٹ کرنے کی ہمت آ گئی، 23جنوری 2024 وہ تاریخ ہے جو کہ ہمیشہ کیلئے میری روح میں نقش ہو گئی ہے۔

گلوکارہ نے بتایا کہ اس دن میری 7سالہ بیٹی عیشا کو آکسیجن کی کمی ہونے کی وجہ سے ایک نہیں بلکہ 2دل کے دورے پڑے۔انہوں نے بتایا کہ میں ہسپتال میں آنسوئوں سے بھری آنکھوں سے اپنی اس بیٹی کو دیکھ رہی تھی جو ہر وقت پرجوش انداز میں گھر میں اچھل کود کرتی رہتی تھی اور دل کا دورہ پڑنے کے بعد بے ہوش تاروں اور مشینوں میں الجھی ہوئی پڑی تھی۔

(جاری ہے)

عینی خالد نے بتایا کہ میری عیشا بالکل صحت مند پیدا ہوئی تھی اسے کوئی بیماری نہیں تھی لیکن اب اسے کے جسم کے اعضا میں خرابی اور فالج کا سامنا ہے اور وہ زیادہ چل بھی نہیں سکتی وہیل چیئر اس کی زندگی کا حصہ بن گئی ہے۔

انہوں نے بتایا کہ میں نے زندگی کے اس مشکل ترین لمحے میں بھی اللہ پر اپنے ایمان کو قائم رکھاکیونکہ جب دوا کام نہیں کرتی تو دعا کام آتی ہے۔گلوکارہ نے بتایا کہ میری بیٹی کا زندہ بچنا ایک معجزہ ہے اور ڈاکٹرز بھی یہ دیکھ کر حیران ہیں وہ صحت یاب ہو رہی ہے لیکن میرا یقین ہے کہ جہاں انسان کی عقل ختم ہو جاتی ہے وہاں سے اللہ کی رحمت شروع ہوتی ہے۔انہوں نے بتایا کہ میری بیٹی زندہ ہے، مسکرا رہی ہے، ہنس رہی ہے اور صحت یاب ہو رہی ہے اور انشا اللہ وہ ایک دن پھر چلنے بھی لگے گی۔