لیسکو کا مون سون بارشوں کے دوران خراب اور جلنے والے میٹرز کو بلا معاوضہ تبدیل کرنے کا اعلان

لاہور(اردوپوائنٹ اخبار تازہ ترین۔31جولائی 2025)لیسکو نے مون سون بارشوں کے دوران خراب اور جلنے والے میٹرز کو بلا معاوضہ تبدیل کرنے کا اعلان کردیا، میٹر بلا ڈیمانڈ نوٹس مفت میں تبدیل کیا جائے گا، جاری کردہ اعلامیے کے مطابق سنگل فیز، تھری فیز اور ایل ٹی ٹو جیسے تمام اقسام کے میٹرز کو تبدیل کیا جائے گا اور ڈیفیکٹیو کوڈ کے تحت دو ماہ کے اندر اندر میٹر کی تبدیلی یقینی بنائی جائے گی۔

لیسکو حکام کے مطابق صارفین سے میٹر کی تبدیلی کی کوئی فیس وصول نہیں کی جائے گی۔لیسکو چیف انجینئر رمضان بٹ نے بتایا کہ اس مقصد کیلئے 3.52 ارب روپے کا بجٹ مختص کر دیا گیا ہے۔دوسری جانب نیپرا نے بھی بجلی کے نرخوں میں کمی کا عندیہ دیا ہے جو صارفین کیلئے بڑے ریلیف کا باعث بن سکتا ہے، جون کی فیول ایڈجسٹمنٹ کی مد میں بجلی 65 پیسے فی یونٹ سستی کرنے کی سی پی پی اے کی درخواست پر سماعت مکمل ہو چکی ہے۔

(جاری ہے)

اگر منظوری دی گئی تو عوام کو مجموعی طور پر 8 ارب روپے سے زائد کا ریلیف ملنے کا امکان ہے۔نیپرا جلد ہی حتمی اعداد و شمار کا جائزہ لے کر بجلی کی قیمتوں میں کمی کا فیصلہ جاری کرے گا، جس سے صارفین کو دوہرا ریلیف ملنے کی امید ہے۔نیپرا نے جون کی فیول ایڈجسٹمنٹ کی مد میں بجلی 65 پیسے سستی کرنے کی درخواست پر سماعت کی تھی اگر درخواست منظور ہوئی تو صارفین کو مجموعی طور پر 8 ارب سے زائد کا ریلیف ملے گا۔

واضح رہے کہ اس سے قبل ملک بھر کے بجلی صارفین کیلئے قیمت میں کمی کا امکان بتایاگیاتھا۔ سی پی پی اے نے سہہ ماہی ایڈجسٹمنٹ کی مد میں درخواست دائر کر دی تھی۔ آئندہ 3 ماہ کیلئے بجلی ایک روپے 75 پیسے فی یونٹ سستی ہونے کا امکان تھا۔ نیپرا سی پی پی اے کی درخواست پر 4 اگست کو سماعت کرے گا۔ درخواست مالی سال 2024-25 کی چوتھی سہہ ماہی کی مد میں دائر کی گئی تھی۔ منظوری کی صورت میں صارفین کو 53 ارب 39 کروڑ روپے سے زائد ریلیف کا ملے گا۔ستمبر اکتوبر اورنومبر کیلئے 2روپے 10پیسے فی یونٹ ریلیف ملیگا،اگست ستمبر اور اکتوبر کیلئے 1 روپے 75پیسے ریلیف ملے گا۔نرخوں میں کمی اطلاق کے ای سمیت ملک بھر کے صارفین کیلئے ہوگا۔نیپرا درخواست پر سماعت کے بعد قیمتوں کے حوالے سے حتمی فیصلہ کرے گا۔