جاپان میں گرمی کا نیا ریکارڈ قائم،درجہ حرات بلندترین سطح پرپہنچ گیا

سیاحتی مقام کیوٹو میں بھی پارہ 40 ڈگری سینٹی گریڈ تک پہنچ گیا،محکمہ موسمیات

جمعرات 31 جولائی 2025 14:15

ٹوکیو(اُردو پوائنٹ اخبارتازہ ترین - این این آئی۔ 31 جولائی2025ء)جاپان میں گرمی کا نیا ریکارڈ قائم ہوگیا، ملک میں درجہ حرارت نئی بلند ترین سطح پر پہنچ گیا۔بین الاقوامی میڈیا کی رپورٹ کے مطابق حالیہ برسوں میں موسمیاتی تبدیلی کی وجہ سے جب دنیا بھر میں درجہ حرارت میں اضافہ دیکھنے میں آیا ہے تو جاپان بھی شدید گرمی کی لپیٹ میں آنے سے محفوظ نہیں رہا۔

جاپانی محکمہ موسمیات نے بتایا کہ پریفیکچر ہیوگو کے مغربی علاقے میں گزشتہ روزدرجہ حرارت 41.2 ڈگری سینٹی گریڈ تک پہنچ گیا۔جاپانی محکمہ موسمیات نے مزید بتایا کہ پریفیکچر ہیوگو کے مغربی علاقے میں بدھ کے روز بننے والے گرمی کے نئے ریکارڈ نے 2020 میں ہماماتسو اور 2018 میں کماگایا میں پڑنے والی 41.1 سینٹی گریڈ کی گرمی کے پچھلے ریکارڈ کو توڑ دیا ہے۔

(جاری ہے)

جاپانی محکمہ موسمیات نے یہ بھی بتایا کہ سیاحتی مقام کیوٹو میں بھی پارہ 40 ڈگری سینٹی گریڈ تک پہنچ گیا۔رپورٹ کے مطابق جاپان میں حالیہ دنوں میں اس قدر گرمی پڑ رہی ہے کہ گزشتہ ہفتے جاپان بھر سے 10 ہزار 804 افراد ہیٹ اسٹروک کا شکار ہوئے۔رپورٹ میں یہ بھی بتایا ہے کہ ملک میں گرمی کی شدت کی وجہ سے 16 افراد ہلاک ہو چکے ہیں، حکومت کی جانب سے جاپان کے کئی شہروں میں ہیٹ اسٹروک کا الرٹ بھی جاری کیا جا چکا ہے اور حکام نے عوام سے احتیاط برتنے کی اپیل کی ہے۔ رپورٹ کے مطابق یہ ریکارڈ اس دن سامنے آیا ہے جب مشرقی روس میں 8.8 شدت کے زلزلے کے بعد جاپان میں سونامی کے خطرے کے پیشِ نظر ہائی الرٹ جاری کیا گیا۔