درخواست میں اہم قانونی نکات اٹھائے گئے ‘ ہائیکورٹ نے جمشید دستی کی درخواست پر تحریری حکم جاری کردیا

لاہور ہائیکورٹ کی چیف جسٹس مس عالیہ نیلم کی سربراہی میں 3 رکنی بنچ نے گزشتہ سماعت کا حکم جاری کیا

جمعہ 1 اگست 2025 12:27

درخواست میں اہم قانونی نکات اٹھائے گئے ‘ ہائیکورٹ نے جمشید دستی کی ..

لاہور(اُردو پوائنٹ اخبارتازہ ترین - این این آئی۔ 01 اگست2025ء)لاہور ہائیکورٹ نے سابق رکن قومی اسمبلی جمشید دستی کی نااہلی کے خلاف درخواست پر تحریری حکم جاری کر دیا۔لاہور ہائیکورٹ کی چیف جسٹس مس عالیہ نیلم کی سربراہی میں 3 رکنی بنچ نے گزشتہ سماعت کا حکم جاری کیا۔لاہور ہائیکورٹ نے سابق رکن قومی اسمبلی جمشید دستی کی نااہلی کے خلاف دائر درخواست پر تحریری حکم جاری کرتے ہوئے این اے 175 مظفر گڑھ کے انتخابی شیڈول کو معطل کر دیا ہے۔

(جاری ہے)

تحریری حکم نامے میں کہا گیا کہ الیکشن کمیشن کی جانب سے 14 جولائی کو جاری انتخابی شیڈول کا نوٹیفکیشن معطل کیا جاتا ہے، درخواست میں اہم قانونی نکات اٹھائے گئے ہیں جن میں الیکشن کمیشن کے فیصلے اور عدالتی دائرہ اختیار سے متعلق سوالات شامل ہیں۔حکم نامے میں کہا گیا کہ عدالت الیکشن کمیشن کو نوٹس جاری کرتی ہے، اٹارنی جنرل آف پاکستان کو 27 اے کا نوٹس جاری کیا جاتا ہے، عدالت مزید سماعت 10 ستمبر کو کرے گی۔یاد رہے کہ جمشید دستی نے الیکشن کمیشن کی جانب سے اپنی نااہلی کے فیصلے کیخلاف لاہور ہائیکورٹ سے رجوع کیا گیا تھا۔