لاہور میں ایک لاکھ روپے کے54چالان جمع نہ کروانے والی گاڑی پکڑی گئی

گاڑی کے ڈرائیور نے 32 مرتبہ ٹریفک سگنل اور 20 مرتبہ لین لائن کی خلاف ورزی کی تھی. ترجمان ٹریفک پولیس

میاں محمد ندیم پیر 14 ستمبر 2026 23:15

لاہور میں ایک لاکھ روپے کے54چالان جمع نہ کروانے والی گاڑی پکڑی گئی

لاہور(اردوپوائنٹ اخبارتازہ ترین-انٹرنیشنل پریس ایجنسی۔14 ستمبر ۔2026 ) لاہور ٹریفک پولیس نے ای چالان کی ادائیگی نہ کرنے والی سرکاری اور نیم سرکاری گاڑیوں کے خلاف کریک ڈاﺅن مزید تیز کر دیا ہے،پیٹرولنگ آفیسر نے ایک گاڑی کے ای چالان چیک کیے تو 1 لاکھ روپے سے زائد مالیت کے 54 ای چالان نکل آئے. کریک ڈاﺅن کے سلسلے میں ٹریفک پولیس کی جانب سے تمام نادہندہ سرکاری محکموں کو ای چالان کی کلیئرنس کے لیے مراسلہ بھی ارسال کر دیا گیا ہے ٹھوکر نیاز بیگ کے قریب پیٹرولنگ آفیسر زاہد نے ایک گاڑی کے ای چالان چیک کیے تو 1 لاکھ روپے سے زائد مالیت کے 54 ای چالان نکل آئے،ریکارڈ کے مطابق کار ڈرائیور نے 32 مرتبہ ٹریفک سگنل اور 20 مرتبہ لین لائن کی خلاف ورزی کی تھی.

(جاری ہے)

ترجمان ٹریفک پولیس کے مطابق ڈرائیور کی جانب سے تمام واجب الادا جرمانہ ادا کرنے کے بعد گاڑی کو چھوڑ دیا گیا چیف ٹریفک آفیسر (سی ٹی او) لاہور سید عبدالرحیم شیرازی نے بتایا کہ شہر لاہور میں 20 سے زائد ٹریفک خلاف ورزیوں پر اے این پی آر (ANPR) کیمروں کی مدد سے ای چالان جاری کیے جا رہے ہیں. انہوں نے شہریوں کو ای چالان سے بچنے کے لیے ٹریفک قوانین کی پاسداری کی ہدایت کی اور واضح کیا کہ جعلی یا بلا نمبر پلیٹس اور نمبر پلیٹس کے ساتھ چھیڑ چھاڑ کرنے والوں کے خلاف بلا امتیاز سخت کریک ڈاﺅن جاری ہے.