صوبائی وزیر صحت ڈاکٹر عذرا پیچوہو کا نوابشاہ میں تھیلی سیمیا کیئر سینٹر اور نادرا ڈیسک کا افتتاح

جمعہ 1 اگست 2025 17:37

حیدرآباد (اُردو پوائنٹ اخبارتازہ ترین - اے پی پی۔ 01 اگست2025ء) صوبائی وزیر صحت ڈاکٹر عذرا فضل پیچوہو نے نوابشاہ میں تھیلی سیمیا کیئر سینٹر میں جدید مشینری اور لیبارٹری کا افتتاح کیا جبکہ نادرا آفس نوابشاہ میں تھیلی سیمیا سکریننگ ٹیسٹ کے لیے قائم ڈیسک کا بھی افتتاح کیا۔ اس موقع پر ڈی جی نادرا عامر علی خان، سیکریٹری سندھ بلڈ ٹرانسفیوژن اتھارٹی ڈاکٹر در ناز جمال، ڈپٹی کمشنر شہید بینظیرآباد عبدالصمد نظامانی، ڈائریکٹر انفارمیشن محمد موسیٰ گوندل، ڈی ایچ او ڈاکٹر اسداللہ ڈاہری، میئر قاضی رشید بھٹی سمیت دیگر افسران بھی موجود تھے۔

ڈاکٹر عذرا پیچوہو نے تھیلی سیمیا سینٹر کے مختلف شعبہ جات کا معائنہ کیا جہاں تھیلیسیمیا پیشنٹس ویلفیئر سوسائٹی کے سیکریٹری ڈاکٹر محمد صادق سیال اور جوائنٹ سیکریٹری غلام نبی چنہ نے انہیں تفصیلی بریفنگ دی۔

(جاری ہے)

انہوں نے ادارے میں موجود سہولیات اور انتظامات پر اطمینان کا اظہار کیا اور کہا کہ یہ دیکھ کر خوشی ہوئی کہ انتظامیہ بہتر انداز میں کام کر رہی ہے۔

انہوں نے مزید کہا کہ سندھ اسمبلی میں تھیلیسیمیا کی روک تھام اور آگاہی سے متعلق بل پیش کیا جائے گا تاکہ اس مرض کے سدباب کے لیے مؤثر اقدامات کیے جا سکیں۔ ان کا کہنا تھا کہ تھیلی سیمیا کیئر سینٹر نوابشاہ کو مزید فعال بنایا جائے گا تاکہ رجسٹرڈ 2600 سے زائد بچوں کو خون، ادویات اور دیگر ضروری سہولیات بلا تعطل فراہم کی جا سکیں۔