گورنر خیبرپختونخوا فیصل کریم کنڈی کی چیئرمین نادرا لیفٹیننٹ جنرل (ر) محمد منیر افسر سے ملاقات

جمعہ 1 اگست 2025 18:29

اسلام آباد (اُردو پوائنٹ اخبارتازہ ترین - اے پی پی۔ 01 اگست2025ء) گورنر خیبرپختونخوا فیصل کریم کنڈی نے چیئرمین نادرا لیفٹیننٹ جنرل (ر) محمد منیر افسر سے اسلام آباد میں ملاقات کی جس کے دوران خیبرپختونخوا کے دور دراز اور پسماندہ علاقوں میں نادرا سہولیات کے دائرہ کار کو فوری طور پر وسعت دینے پر تبادلہ خیال کیا گیا۔ گورنر ہائوس اسلام آباد سے جاری بیان کے مطابق خیبر پختونخوا اسمبلی میں پیپلز پارٹی کے پارلیمانی لیڈر احمد کریم کنڈی بھی گورنر کے ہمراہ تھے۔

ملاقات میں صوبے کے عوام کو شناختی دستاویزات اور شہری سہولیات کی فراہمی کے حوالے سے نادرا کی خدمات پر تفصیلی گفتگو ہوئی۔ اس موقع پر گورنر نے خیبرپختونخوا کے دور دراز اور پسماندہ علاقوں میں نادرا سہولیات کی عدم دستیابی پر تشویش کا اظہار کرتے ہوئے مطالبہ کیا کہ وہاں خدمات کے دائرہ کار کو فوری طور پر وسعت دی جائے۔

(جاری ہے)

خاص طور پر ڈیرہ اسماعیل خان کی تحصیل پہاڑ پور کے بڑے دیہاتوں میں نادرا دفاتر کے قیام پر گفتگو کی گئی تاکہ مقامی آبادی کو ان کی دہلیز پر سہولیات میسر آ سکیں۔

چیئرمین نادرا نے گورنر کو یقین دہانی کرائی کہ نادرا جلد ہی ان علاقوں میں موبائل رجسٹریشن وینز کی تعداد میں اضافہ کرے گا اور مستقل دفاتر کے قیام کے لیے مقامی انتظامیہ کے ساتھ مشاورت شروع کی جائے گی۔ مزید یہ کہ خواتین، بزرگ شہریوں اور معذور افراد کے لیے علیحدہ سہولتی ڈیسک قائم کیے جائیں گے تاکہ ان کی رجسٹریشن کا عمل سہل بنایا جا سکے۔ملاقات میں شناختی کارڈ، ب فارم، بچوں کی رجسٹریشن اور فیملی ورثاء کی اپ ڈیٹس جیسے دیگر اہم امور بھی زیر غور آئے۔ گورنر نے نادرا کی جاری ڈیجیٹلائزیشن مہم اور سائبر سکیورٹی اقدامات کو سراہتے ہوئے کہا کہ جدید ٹیکنالوجی کا استعمال نادرا کو مزید موثر اور شفاف ادارہ بنانے میں مددگار ثابت ہوگا۔