راولپنڈی میںنوکری کا جھانسہ دیکر انسانی اعضا کی پیوند کاری میں ملوث 4 رکنی گینگ گرفتار

ہفتہ 2 اگست 2025 16:59

راولپنڈی (اُردو پوائنٹ اخبارتازہ ترین - این این آئی۔ 02 اگست2025ء)راولپنڈی پولیس نے نوکری کا جھانسہ دے کر انسانی اعضا کی غیر قانونی پیوند کاری میں ملوث 4 رکنی گینگ کوگرفتار کرکے پیوند کاری میں استعمال ہونے والے آلات برآمد کر لیے۔میڈیا رپورٹ کے مطابق راولپنڈی کی تھانہ ایئرپورٹ پولیس نے ملزمان نے پاکستانی و غیر ملکی شہریوں کے لیے گردے فروخت کرنے کا انکشاف کیا ہے۔

(جاری ہے)

حکام کے مطابق پولیس کو 15 پر اطلاع موصول ہوئی تھی کہ ایک گھر سے کسی کے چیخنے چلانے کی آوازیں آرہی ہیں، پولیس نے فوری رسپانڈ کیا تو ایک شخص کو اسٹریچر سے بندھا پایا، جسے آزاد کروایا گیا اس حوالے سے درج کیے گئے مقدمے کے مطابق متاثرہ شخص نے بتایا کہ اسے نوکری کا جھانسہ دے کر بلایا گیا تھا۔پولیس کے مطابق شہری کو بلا کر نشہ آور شے پلا کر نیم بیہوش کیا گیا اور مختلف میڈیکل ٹیسٹ کیے گئے، ٹیسٹ کروانے کا مقصد متاثرہ شخص کا گردہ نکال کر فروخت کرنا تھا۔پولیس نے ملزمان عاکف، نسیم، راکیش اور ساون کو گرفتار کر لیا ہے۔