یومِ آزادی صرف جشن کا دن نہیں بلکہ عزمِ نو کی تجدید کا موقع بھی ہے

یومِ آزادی معرکہ حق‘ قربانیوں سے جڑی پاکستان کی کہانی، کرنل جی بی شاہ (ر) کی زبانی

اتوار 3 اگست 2025 12:10

اسلام آباد(اُردو پوائنٹ اخبارتازہ ترین - این این آئی۔ 03 اگست2025ء)یومِ آزادی کے موقع پر معرکہ حق کی اس تاریخی جدوجہد کو یاد کرتے ہوئے کرنل جی بی شاہ (ریٹائرڈ) نے پاکستان کی بنیادوں میں چھپی قربانیوں اور جذبوں کی داستان کو اجاگر کیا ہے۔کرنل جی بی شاہ کے مطابق 14 اگست صرف ایک تاریخ نہیں، بلکہ وہ دن ہے جب ایک آزاد اور خودمختار ریاست کا خواب حقیقت کا روپ دھار گیا۔

کرنل جی بی شاہ کا کہنا تھا کہ یومِ آزادی صرف جشن کا دن نہیں بلکہ عزمِ نو کی تجدید کا موقع بھی ہے۔ یہ دن ہمیں ہمارے ان بزرگوں کی یاد دلاتا ہے جنہوں نے وطن عزیز کے لیے بے مثال قربانیاں دیں اور تحریکِ آزادی میں ہر طرح کی مشکلات کا سامنا کیا۔انہوں نے تحریکِ آزادی کے اہم حقائق پر روشنی ڈالتے ہوئے کہا کہ پاکستان کی بنیاد قربانی، جدوجہد اور ایمان پر رکھی گئی۔

(جاری ہے)

ان کے بقول 1947 کے بعد پاکستان کا قائم رہنا محض جذبے کی بدولت ممکن ہوا، کیونکہ اُس وقت سول ایڈمنسٹریشن تقریباً مفلوج ہوچکی تھی، بڑے افسران ہندوستان جا چکے تھے اور وسائل کی شدید کمی کا سامنا تھا۔انہوں نے مزید کہا کہ وہ مہاجرین جو اعلیٰ عہدوں پر فائز تھے، پاکستان آکر کم تنخواہوں پر کام کرنے کو تیار ہوئے تاکہ نئی ریاست کو مالی فائدہ ہو۔کرنل شاہ کے مطابق یہی ایثار، قربانی اور خلوصِ نیت اس ملک کی اصل طاقت بنے، جنہوں نے پاکستان کو ابتدائی بحرانوں سے نکال کر استحکام کی راہ دکھائی۔