وزیر اعلیٰ مریم نواز کا پنجاب کو زہریلے صنعتی مادوں ودھاتوں سے پاک کرنے کیلئے میگا آپریشن شروع کرنیکا حکم

اتوار 3 اگست 2025 16:20

لاہور (اُردو پوائنٹ اخبارتازہ ترین - اے پی پی۔ 03 اگست2025ء) وزیر اعلیٰ پنجاب مریم نواز نے صوبے کو زہریلے صنعتی مادوں اور زہریلی دھاتوں سے پاک کرنے کیلئے میگا آپریشن کا حکم دے دیا،اس سلسلہ میں صوبہ بھر میں ہنگامی بنیادوں پر سروے کا آغاز کر دیا گیا ہے ۔ترجمان ایوان وزیر اعلیٰ کے مطابق صنعتوں سے نکلنے والے زہریلے کچرے و مواد کو نہروں اور نالوں میں پھینکنے پر مکمل پابندی ہوگی، زہریلا کچرا عوام میں مہلک بیماریاں پھیلانے کی بنیادی وجہ ہے ،ویسٹ ٹریٹمنٹ کے بغیر سوسائٹیاں بند کرنے کا بھی فیصلہ کیا گیااور28 ہائوسنگ سوسائٹیوں وصنعتوں کو نوٹس جاری کر دیئے گئے ہیں۔

وزیراعلیٰ مریم نوازنے ہڈیارہ ڈرین میں زہریلے اور انسانی صحت کیلئے خطرناک کچرا ڈالنے کا سخت نوٹس لے کر کارروائی کا حکم اور اداروں کو 10 اگست تک ہڈیارہ ڈرین کی صفائی کی ڈیڈلائن دیدی۔

(جاری ہے)

اس ضمن میں سینئر صوبائی وزیر مریم اورنگزیب کی زیر صدارت اجلاس منعقد ہوا جس میں انڈسٹریل یونٹس اور ہائوسنگ سوسائٹیوں کیخلاف فوری کارروائی کا فیصلہ کیا گیا۔

اجلاس میں سینئر صوبائی وزیرکو بریفنگ دی گئی جس میں بتایا گیا کہ ماحول کے تحفظ (ای پی اے)کے ادارے کی قیادت میں ضلعی انتظامیہ، آبپاشی، واسا، انڈسٹری، صحت اور ایل ڈی اے سمیت دیگر متعلقہ محکمے مل کر میگا آپریشن کریں گے،پنجاب بھر میں نہروں اور نالوں کا معائنہ ہوگا، ماحول کا عالمی معیار قائم کیا جائے گا۔ اجلاس کو بریفنگ میں بتایا گیا کہ زہریلے صنعتی کچرے سے ہیضہ، ٹائیفائیڈ، پھیپڑوں کے کینسر سمیت دیگر مہلک بیماریاں بڑھ رہی ہیں، فیصل آباد، شیخوپورہ، سیالکوٹ اور قصور کے صنعتی نالوں کی اسٹڈی اورآلودگی پھیلانے پر جرمانوں کی قانون سازی مکمل کر لی گئی جس پر فوری عمل درآمد کرنے اورحکومت کا ویسٹ ٹریٹمنٹ پلانٹ لگانے کیلئے صنعتوں کو بلا سود قرضے دینے کا فیصلہ کیا ہے۔

سینئر صوبائی وزیر نے سیکرٹری انڈسٹری کو قائداعظم انڈسٹریل اسٹیٹ میں فوری ویسٹ واٹر پلانٹ لگانے ،10 اگست سے فیصلہ کن کارروائی کا آغا کرنے اور31 اگست تک ہیلتھ سروے مکمل کر کے رپورٹ پر عمل یقینی بنانے کی ہدایت کی۔