تنقید کرنے والوں کو مریم نواز کے منصوبوں تک پہنچنے کیلئے بڑی محنت کرنا پڑے گی،رانا ثناء اللّٰہ

الیکٹرک بس سے فیصل آباد کے بزرگوں اور خواتین کو زیادہ فائدہ پہنچے گا، لیگی رہنما کا تقریب سے خطاب

منگل 30 ستمبر 2025 02:40

تنقید کرنے والوں کو مریم نواز کے منصوبوں تک پہنچنے کیلئے بڑی محنت کرنا ..

فیصل آباد (اُردو پوائنٹ اخبارتازہ ترین - این این آئی۔ 30 ستمبر2025ء)پاکستان مسلم لیگ ن کے رہنما رانا ثناء اللّٰہ نے کہا ہے کہ مریم نواز نے مسلم لیگ ن کو اپنی سیاست سے مضبوط کیا، تنقید کرنے والوں کو مریم نواز کے منصوبوں تک پہنچنے کیلئے بڑی محنت کرنا پڑے گی۔تقریب سے خطاب کے دوران رانا ثناء اللّٰہ نے کہا کہ مخالفین کہتے ہیں کہ میڈیا کوریج بہت ہے، پنجاب حکومت کی عوامی خدمت پر کوریج میڈیا کی مجبوری ہے۔

رانا ثناء اللّٰہ نے کہا کہ الیکٹرک بس منصوبے پر پورا فیصل آباد مریم نواز کا شکر گزار ہے، الیکٹرک بس سے فیصل آباد کے بزرگوں اور خواتین کو زیادہ فائدہ پہنچے گا۔انہوں نے کہا کہ ڈیڑھ سال میں مریم نواز نے خدمت کی سیاست کو عروج دیا، انہوں نے پنجاب میں صحت کے مختلف منصوبے شروع کیے، پنجاب میں لوگوں کو ان کی دہلیز پر ادویات مل رہی ہیں، آج میزبان پنجاب حکومت اور مہمان عوام ہے۔

(جاری ہے)

رانا ثناء اللّٰہ نے کہا کہ مسلم لیگ ن خدمت کی سیاست پر یقین رکھتی ہے، مسلم لیگ ن نے ہمیشہ عام آدمی کے مسائل کو حل کرنے پر توجہ دی۔رانا ثناء اللّٰہ نے کہا کہ پی ٹی آئی دور حکومت میں لوگوں کا استحصال کیا گیا، مسلم لیگ ن نے سیاست کے لیے قربانیاں دیں، جیلیں کاٹیں، مسلم لیگ ن نے ہمیشہ عام آدمی کے مسائل کو حل کرنے پر توجہ دی ہے۔رانا ثناء اللّٰہ نے کہا کہ پوری پارٹی قید تھی اور مریم نواز نے اس وقت پارٹی سنبھالی، کراچی سے کوئٹہ تک ن لیگ کو مریم نواز نے سنبھالا، ان کی قیادت میں پنجاب ترقی یافتہ پنجاب بنے گا۔رانا ثناء اللّٰہ نے کہا کہ پنجاب حکومت کی مصروفیت عوامی خدمت پر اور ناقدین کا وقت تنقید میں گزرتا ہے۔