راولپنڈی پولیس کی جانب سے شہر بھر میں گرجا گھروں کی سکیورٹی کے لیے جامع اور مؤثر انتظامات کیے گئے ہیں

اتوار 3 اگست 2025 19:10

راولپنڈی (اُردو پوائنٹ اخبارتازہ ترین - اے پی پی۔ 03 اگست2025ء) راولپنڈی پولیس کی جانب سے شہر بھر میں گرجا گھروں کی سکیورٹی کے لیے جامع اور مؤثر انتظامات کیے گئے ہیں۔ پولیس ترجمان کے مطابق سکیورٹی ڈیوٹی کے لیے 400 سے زائد افسران و جوان تعینات کیے گئے ہیں جو اپنے فرائض احسن طریقے سے انجام دے رہے ہیں۔

(جاری ہے)

سینئر پولیس افسران مختلف مقامات پر سکیورٹی انتظامات کا جائزہ لے رہے ہیں اور ڈیوٹی پر موجود اہلکاروں کو بریفنگ بھی دی جا رہی ہے۔

اس کے علاوہ تھانوں کی موبائلز، ایلیٹ فورس اور ڈولفن فورس کی خصوصی ٹیمیں شہر بھر میں گشت کے فرائض انجام دے رہی ہیں تاکہ کسی بھی ناخوشگوار واقعے سے بروقت نمٹا جا سکے۔ سی پی او کا کہنا ہے کہ شہریوں کی جان و مال کا تحفظ راولپنڈی پولیس کی اولین ترجیح ہے اور اس مقصد کے لیے تمام دستیاب وسائل بروئے کار لائے جا رہے ہیں۔