وزیراعلیٰ کی خصوصی ہدایت پر ڈویلپمنٹ اتھارٹیوں میں ٹیپا کی طرز پر ایجنسیاں قائم کرنے کا فیصلہ

ہفتہ 20 ستمبر 2025 19:18

لاہور(اُردو پوائنٹ اخبارتازہ ترین - این این آئی۔ 20 ستمبر2025ء) وزیراعلیٰ پنجاب مریم نوازشریف کی خصوصی ہدایت پر ڈویلپمنٹ اتھارٹیوں میں ٹیپا کی طرز پر ایجنسیاں قائم کرنے کا فیصلہ کیا گیا ہے ۔ سیکرٹری ہاؤسنگ نورالامین مینگل کی زیر صدارت اجلاس میں سڑکوں کے روڈ لیولز اور سیوریج کے نظام سے متعلق اہم فیصلے کیے گئے اور شہریوں کو اربن فلڈنگ کے خطرات سے بچانے اور ٹریفک مسائل کے حل کے لیے جامع حکمت عملی تیار کی گئی ۔

ترجمان محکمہ ہاؤسنگ کے مطابق اجلاس میں فیصلہ کیا گیا کہ سڑکوں کی اقسام کی بنیاد پر روڈ لیولز کا تعین کیا جائے گا اور ٹیپا کے تجویز کردہ رولز کی منظوری لی جائے گی۔ ترجمان کے مطابق ایل ڈی اے، ٹیپا، واسا، سی بی ڈی اور دیگر متعلقہ ادارے پوٹ ہولز اور ٹوٹی ہوئی سڑکوں کی نشاندہی اور مرمت کریں گے جبکہ پی ایچ اے اربن فلڈنگ کی روک تھام کے لیے گرین بیلٹس پر کام کرے گی۔

(جاری ہے)

اجلاس میں طے کیا گیا کہ واسا سیوریج سسٹم کے علاوہ بارشی پانی کے نکاس کا نظام تشکیل دے گا اور تمام متعلقہ ادارے سڑکوں کی تعمیر سے قبل روڈ لیول اور سائنیج کے لیے ٹیپا سے این او سی لینے کے پابند ہوں گے۔ ترجمان کے مطابق صوبے کی دیگر ڈویلپمنٹ اتھارٹیوں میں بھی ٹیپا ایجنسیاں تشکیل دی جائیں گی اور جی پی ایس ٹیکنالوجی کے ذریعے توجہ طلب پوائنٹس کی نشاندہی اور مانیٹرنگ کی جائے گی۔

ترجمان کے مطابق وزیر اعلیٰ پنجاب کی منظوری کے لیے سمری پر کام جاری ہے اور تمام اقدامات شہریوں کو اربن فلڈنگ کے خطرات سے بچانے میں کارگر ثابت ہوں گے۔ترجمان کے مطابق ٹیپا کے تجویز کردہ رولز سے ٹریفک مسائل کے حل میں مدد ملے گی جبکہ گرین بیلٹس کی اونچائی کو کم کرکے اربن فلڈنگ کی روک تھام میں مدد ملے گی۔ ترجمان محکمہ ہاؤسنگ کے مطابق روڈ اور پلنتھ لیول کے تعین سے شہروں کی خوبصورتی میں اضافہ ہو گا۔